Live Updates

پی ٹی آئی ارکان کا اسپیکر کی عدم موجودگی کے باوجود اسپیکر آفس جانے کا فیصلہ

جب بھی ہم اسپیکر کے سامنے پیش ہونے کا کہتے ہیں وہ بھاگ جاتے ہیں،ہم تو اسعتفوں کی تصدیق کے لیے جائیں گے۔پی ٹی آئی رہنما فواد چوہدری کی گفتگو

مقدس فاروق اعوان منگل 27 دسمبر 2022 12:38

پی ٹی آئی ارکان کا اسپیکر کی عدم موجودگی کے باوجود اسپیکر آفس جانے کا ..

اسلام آباد(اردوپوائنٹ اخبارتازہ ترین۔ 27 دسمبر 2022ء) پاکستان تحریک انصاف نے اسپیکر کی عدم موجودگی کے باوجود اسپیکر آفس جانے کا فیصلہ کیا ہے۔پی ٹی آئی ارکان قومی اسمبلی کا اجلاس کل کے پی ہاؤس اسلام آباد میں ہوگا۔چیئرمین پی ٹی آئی عمران خان کل ارکان قومی اسمبلی کے اجلاس کی صدارت کریں گے۔ عمران خان بذریعہ ویڈیو لنک پر اجلاس میں خطاب کریں گے۔

ذرائع کے مطابق پی ٹی آئی ارکان قومی اسمبلی کل اپنے ہاتھوں سے استعفے تحریر کریں گے۔عمران خان ویڈیو لنک کے ذریعے ارکان کو آئندہ کی حکمت عملی بارے آگاہ کریں گے۔پی ٹی آئی رہنما فواد چوہدری کا کہنا ہے کہ جب بھی ہم اسپیکر کے سامنے پیش ہونے کا کہتے ہیں وہ بھاگ جاتے ہیں۔کل ہمارے ارکان کا اجلاس کے پی ہاؤس اسلام آباد میں ہوگا۔

(جاری ہے)

ہم تو اسعتفوں کی تصدیق کے لیے جائیں گے۔

قبل ازیں پی ٹی آئی کی جانب سے استعفوں کی تصدیق کے اعلان کے بعد اسپیکرکی بیرون ملک روانگی کی مذمت کی گئی ۔عمران خان کی زیر صدارت زمان پارک میں اجلاس ہوا جس میں پی ٹی آئی اراکین قومی اسمبلی کے استعفوں کی اسپیکر سے منظوری کی حکمت عملی پرغورکیا گیا۔ عمران خان کا کہنا تھا کہ 8 ماہ پہلے تک ملک معاشی طورپرمستحکم اور دہشت گری ختم ہوچکی تھی، اب پھر سے ملک میں دہشت گردی کے واقعات میں 52 فی صد اضافہ ہوا ہے، بیرونی اشاروں پربرپا کی گئی سازش کےنتائج سے پہلےہی خبردارکیا تھا، مسلط شدہ کرپٹ نااہل حکمران قوم کو حادثات کی جانب دھکیل رہے ہیں۔

اعلامیے کے مطابق اراکین کے استعفوں کی تصدیق کے اعلان کے بعد اسپیکر کی بیرون ملک دورے پر روانگی کی مذمت کی گئی اورکہا گیا کہ اسپیکرکا جانبدارانہ کردار اور حکومت سے ملی بھگت پارلیمان کی توہین ہے۔ اس موقع پر عمران خان کا کہنا تھا کہ قومی سلامتی کو زرداری کے سیاسی نابالغ فرزند کے رحم و کرم پر چھوڑنا مجرمانہ حماقت ہے،قوم سوال پوچھ رہی ہےکہ معیشت کی تباہی کے بعد کس کے اشاروں پر داخلی انتشار کو ہوا دی جارہی ہے۔