دبئی میں 2022ء میں انتہائی پُرآسائش گھروں کی فروخت کا نیا ریکارڈ قائم

دبئی ( اُردو پوائنٹ اخبارتازہ ترین ۔ 16 جنوری 2023ء ) متحدہ عرب امارات کی ریاست دبئی میں سال 2022ء کے دوران انتہائی لگژری گھروں کی فروخت کا نیا ریکارڈ قائم ہوگیا۔ اماراتی میڈیا کے مطابق دبئی کے 10 ملین ڈالر سے زیادہ کے گھروں کی مانگ میں بڑے پیمانے پر اضافہ دیکھا گیا جس کی فروخت پچھلے سال دگنی سے بھی زیادہ ہو گئی کیوں کہ اشرافیہ اور کروڑ پتی کورونا وباء کے بعد بڑی تعداد میں امارات پہنچ گئے، گلوبل پراپرٹی کنسلٹنٹ نائٹ فرینک نے کہا کہ گزشتہ سال 10 ملین ڈالر سے زیادہ کی جائیدادوں کے لیے 219 ٹرانزیکشنز کیے گئے جو کہ دبئی میں سال 2021ء میں ہوئی 93 ٹرانزیکشنز کے مقابلے میں 135 فیصد زیادہ ہے۔

نائٹ فرینک کے پارٹنر اور مشرق وسطیٰ ریسرچ کے سربراہ فیصل درانی نے کہا ہے کہ پچھلے 2 سالوں کے دوران دبئی کی ملٹی ملین ڈالر کے گھروں کی مارکیٹ میں زبردست اضافہ غیر معمولی رہا، دبئی 2010ء میں صرف 11 الٹرا پرائم سیلز سے 2022ء میں 10 ملین ڈالر سے زیادہ 219 سودے رجسٹر کیے، جو 2010 سے 2020 کے درمیان ریکارڈ کی گئی کل تعداد سے بھی زیادہ ہے، مارکیٹ کے اوپری حصے میں کارکردگی واضح طور پر دبئی کی آمد کو ایک لگژری مرکز کے طور پر ظاہر کرتی ہے، یہی وجہ ہے کہ کورونا کے بعد پچھلے دو سالوں میں دنیا بھر سے دولت مند افراد کی بڑے پیمانے پر دبئی آمد دیکھی گئی۔

(جاری ہے)

ہینلے گلوبل سٹیزنز رپورٹ کی طرف سے گزشتہ سال جاری کی گئی ایک تحقیق میں اندازہ لگایا گیا تھا کہ متحدہ عرب امارات اس سال دنیا میں کروڑ پتیوں کی سب سے بڑی تعداد کو راغب کرے گا، ایک اندازہ تھا کہ آسٹریلیا، سنگاپور، اسرائیل، سوئٹزرلینڈ، امریکہ، کینیڈا، نیوزی لینڈ، برطانیہ، بھارت اور دیگر جیسے بڑے ممالک کو پیچھے چھوڑتے ہوئے 4 ہزار کروڑ پتی 2022ء میں متحدہ عرب امارات میں ہجرت کریں گے۔

پرائم ریذیڈنشل کے پارٹنر ہیڈ اینڈریو کمنگز نے مزید کہا کہ خریداروں کا پول غیر معمولی طور پر متنوع ہے، جس میں یورپ، بھارت، یورپ، ایشیا برطانیہ اور مشرقی یورپ شامل ہیں، جو دبئی کی آب و ہوا، حفاظت، تحفظ، کاسموپولیٹن طرز زندگی اور ناقابل یقین حد تک آگے کی سوچ رکھنے والی قیادت کے ذریعے تیار کیا گیا ہے، درج ذیل میں 2010ء سے 2022 تک ہر سال میں فروخت ہوئے 10 ملین ڈالر سے زائد مالیت کے گھروں کی تعداد ہے؛ 

>> 2010ء      11

>> 2011ء      5

>> 2012ء      11

>> 2013ء      20

>> 2014ء      12

>> 2015ء      31

>> 2016ء      15

>> 2017ء      23

>> 2018ء      13

>> 2019ء      22

>> 2020ء      22

>> 2021ء      93

>> 2022ء     219

معلوم ہوا ہے کہ ایمریٹس کی پرائم مارکیٹس ایمریٹس ہلز، جمیرہ بے آئی لینڈ اور دی پام جمیرہ نے 2022ء کے دوران مجموعی طور پر قیمتوں میں 44 فیصد اضافہ درج کیا، پام جمیرہ کا علاقہ شہر کا سٹار پرفارمر بنا ہوا ہے، جہاں پچھلے سال ولا کی قیمتوں میں 49 اعشاریہ 4 فیصد اضافہ ہوا اور کورونا وباء کے آغاز سے ولا کی قیمتوں میں 96 فیصد اضافہ ہوا ہے، انتہائی مطلوب مقامات پر بھی اپارٹمنٹس کی قیمتوں میں نمایاں اضافہ دیکھا گیا ہے، جن میں دبئی ہلز اسٹیٹ سب سے آگے ہے، اس کے بعد دی پام جمیرہ اور ڈاون ٹاؤن دبئی ہے۔