Live Updates

پاکستان میں سیاسی تناؤ کے سبب تشدد پریشان کن ہے

ان حالات میں مجھے پاکستانی عوام کا خیال آتا ہے،پاکستانی رہنماؤں سے جمہوری اور آئینی اصولوں کے احترام کا مطالبہ کرتی ہوں۔ امریکی سینیٹر کیتھرین کورٹیز ماسٹو کا ٹویٹ

مقدس فاروق اعوان جمعہ 24 مارچ 2023 14:33

پاکستان میں سیاسی تناؤ کے سبب تشدد پریشان کن ہے

اسلام آباد(اُردو پوائنٹ،اخبارتازہ ترین ۔ 24 مارچ 2023ء) ڈیمو کریٹ امریکی سینیٹر کیتھرین کورٹیز ماسٹو کا کہنا ہے کہ پاکستان میں سیاسی تناؤ کے سبب تشدد پریشان کن ہے۔انہوں نے سماجی رابطے کی ویب سائٹ ٹویٹر پر ٹویٹ کرتے ہوئے کہا کہ ان حالات میں مجھے پاکستانی عوام کا خیال آتا ہے۔ کیتھرین کورٹیز ماسٹو نے مزید کہا کہ پاکستانی رہنماؤں سے جمہوری اور آئینی اصولوں کے احترام کا مطالبہ کرتی ہوں،امریکی سینیٹر نے کہا کہ امید ہے کہ پاکستانی رہنما عوام کے مستحکم اور خوش حال مستقبل کے لیے کام کر سکتے ہیں۔

گذشتہ کچھ دنوں میں چئیرمین پی ٹی آئی عمران خان کے حق میں کئی امریکی سیاستدانوں کے بیانات سامنے آئے ہیں۔اسی حوالے سے وفاقی وزیر برائے ماحولیاتی تبدیلی سینیٹر شیری رحمان نے کہاہے کہ تحریک انصاف نے امریکہ میں اپنی کھوئی ہوئی ساکھ کو بحال کرنے کیلئے ایک اور لابنگ فرم کے ساتھ معاہدہ کیا ہے۔

(جاری ہے)

اپنے بیان میں وفاقی وزیر نے کہاکہ پرائے کنسلٹنٹ کے ساتھ معاہدے کا مقصد تحریک انصاف کے امریکہ کے ساتھ تعلقات بہتر کرنا ہے۔

انہوںنے کہاکہ ’’سازشی سائفر‘‘میں ناکامی کے بعد اب زور و شور سے ڈالرز میں اثر و رسوخ خریدہ جا رہا، یہ فرم تحریک انصاف کے رہنماؤں کی امریکہ کے ’’ڈسیشن میکرز‘‘کے ساتھ ملاقاتوں کا اہتمام کرے گی۔ وفاقی وزیر نے کہاکہ فرم ان ملاقاتوں کے مواد کے حوالے سے بھی تحریک انصاف کو رہنمائی فراہم کرے گی۔ شیری رحمان نے کہاکہ پاکستان کے امریکہ کے ساتھ تعلقات دائو پر لگا کر یہ اپنی تشہیر کیلئے مسلسل لابنگ کمپنیز کی خدمات لے رہی انہوں نے من گھڑت بیرونی سازش کا بیانیہ بنایا۔

وفاقی وزیر نے کہاکہ آڈیو لیکس میں ثابت ہوا یہ اپنی ذاتی سیاست کیلئے پاکستان کے مفادات کے ساتھ " کھیلنی" کا منصوبہ بنا رہے تھے،ان کا دوہرا معیار اور یو ٹرن کئی بار بے نقاب ہو چکے ہے۔ انہوںنے کہاکہ عمران خان کو ان معاہدوں کے حوالے سے قوم کو وضاحت پیش کرنا ہوگی۔