غزہ: یو این چیف کا یرغمالی کی رہائی کا خیرمقدم اور مستقل جنگ بندی کا مطالبہ

یو این منگل 13 مئی 2025 04:15

اسلام آباد (اُردو پوائنٹ ۔ UN اردو۔ 13 مئی 2025ء) اقوام متحدہ کے سیکرٹری جنرل انتونیو گوتیرش نے غزہ میں ایک یرغمالی کی رہائی کا خیرمقدم کرتے ہوئے علاقے میں مستقل جنگ بندی اور انسانی امداد کی فراہمی بحال کرنے کے مطالبات کا اعادہ کیا ہے۔

سیکرٹری جنرل کا کہنا ہے کہ غزہ سے امریکی یرغمالی ایڈن الیگزنڈر کی رہائی اور ہولناک ابتلا کے بعد اپنے اہلخانہ سے یکجائی ان کے لیے خوشی کا باعث ہے۔

باقیماندہ یرغمالیوں کو بھی فوری رہا کرنا اور غزہ میں مستقبل جنگ بندی کا قیام ضروری ہے۔ تمام یرغمالیوں سے انسان دوست اور وقار پر مبنی سلوک روا رکھا جانا چاہیے۔

21 سالہ ایڈن الیگزنڈر امریکہ اور اسرائیل کی دہری شہریت رکھتے ہیں اور 7اکتوبر 2023 کو حماس کے حملے میں اغوا ہونے سے قبل وہ اسرائیل کی فوج میں خدمات انجام دے رہے تھے۔

(جاری ہے)

اطلاعات کے مطابق، ممکنہ طور پر وہ غزہ میں فلسطینی جنگجوؤں کے پاس امریکہ آخری زندہ قیدی تھے۔

انسانی امداد بحال کرنے کا مطالبہ

سیکرٹری جنرل نے اپنے ترجمان سٹیفن ڈوجیرک کی جانب سے جاری کردہ بیان میں تنازع کے تمام فریقین پر زور دیا ہے کہ وہ غزہ میں انسانی امداد کی فوری، تیزرفتار، بلارکاوٹ اور محفوظ انداز میں فراہمی کو یقینی بنائیں۔

شہریوں کو امداد کی فراہمی لازمی اور اس پر کوئی سمجھوتہ نہیں ہو سکتا۔

انہوں نے مصر، قطر اور امریکہ کی جانب سے غزہ میں جنگ بندی کے لیے جاری کوششوں کو بھی سراہا ہے۔

سیکرٹری جنرل نے تمام فریقین پر زور دیا ہے کہ وہ آج ہونے والی اس رہائی کو ایسے جامع معاہدے تک پہنچنے کے لیے کام میں لائیں جس سے تمام یرغمالیوں کی واپسی اور جنگ بندی ممکن ہو سکے، غزہ میں انسانی امداد کی فراہمی کا راستہ کھلے اور لوگوں کی تکالیف میں کمی آئے۔

یاد رہے کہ غذائی تحفظ کے ماہرین خبردار کر چکے ہیں کہ غزہ کی تمام آبادی کو قحط کا خطرہ لاحق ہے۔ اگر جنگ جاری رہی اور انسانی امداد کی فراہمی بحال نہ ہو سکی تو شہریوں کی زندگی خطرے میں پڑ جائے گی۔