دشمن کی کوئی بھی سازش پاکستان کی مسلح افواج کے عزم کو متزلزل نہیں کرسکتی

معرکہ حق آپریشن بنیان مرصوص کے دوران متحد اورپرعزم ردعمل سامنے آیا، قوم کی ثابت قدمی عسکری تاریخ کا ایک فیصلہ کن باب بن چکا ہے۔ آرمی چیف جنرل سید عاصم منیر کا سی ایم ایچ کا دورہ ، زخمی جوانوں اور شہریوں کی عیادت کی

ثنااللہ ناگرہ پیر 12 مئی 2025 22:00

دشمن کی کوئی بھی سازش پاکستان کی مسلح افواج کے عزم کو متزلزل نہیں کرسکتی

راولپنڈی ( اردوپوائنٹ اخبار تازہ ترین۔ آئی پی اے ۔ 12 مئی 2025ء ) پاک فوج کے سپہ سالار جنرل سید عاصم منیر نے کہا ہے کہ دشمن کی کوئی بھی سازش پاکستان کی مسلح افواج کے عزم کو متزلزل نہیں کرسکتی، معرکہ حق آپریشن بنیان مرصوص کے دوران متحد اور پرعزم ردعمل سامنے آیا، قوم کی ثابت قدمی عسکری تاریخ کا ایک فیصلہ کن باب بن چکا ہے۔ پاک فوج کے شعبہ تعلقات عامہ آئی ایس پی آر کے مطابق آرمی چیف جنرل سید عاصم منیر نے کمبائنڈ ملٹری ہسپتال (سی ایم ایچ ) کا دورہ کیا۔

آرمی چیف نے زخمی فوجی جوانوں اور شہریوں کی خیریت دریافت کی۔آرمی چیف جنرل سید عاصم منیر نے معرکہ حق میں زخمی ہونے والے اہلکاروں سے فرداً فرداً ملاقات کی۔ آرمی چیف نے جوانوں کی غیرمعمولی بہادری اور فرض شناسی کو سراہا۔

(جاری ہے)

آرمی چیف جنرل سید عاصم منیر نے مسلح افواج کی جانب سے زخمیوں کی مستقل دیکھ بھال ، بحالی اور فلاح وبہبودکے عزم کا اعادہ کیا۔

سپہ سالار جنرل سید عاصم منیر نے کہا کہ ہمارے سپاہیوں اور شہریوں کی بہادری اور قربانی پاکستان کی سلامتی کی بنیاد ہے۔پوری قوم اپنی مسلح افواج کے ہرفرد کے ساتھ پرعزم یکجہتی کے ساتھ کھڑی ہے۔ سپہ سالار جنرل سید عاصم منیر نے کہا کہ دشمن کی کوئی بھی سازش پاکستان کی مسلح افواج کے عزم کو متزلزل نہیں کرسکتی۔ معرکہ حق آپریشن بنیان مرصوص کے دوران متحد اور پرعزم ردعمل سامنے آیا۔ یہ ردعمل عوام کی ثابت قدمی حمایت کے ساتھ ملک کی عسکری تاریخ کا ایک فیصلہ کن باب بن چکا ہے۔