میں نے پاکستان اور بھارت کے درمیان ایٹمی جنگ رکوا دی

پاکستان اور بھارت سے کہا کہ اگر کشیدگی ختم کردیں تو امریکا مزید تجارت کرے گا ، بصورت دیگر کوئی تجارت نہیں ہوگی، امریکی صدر کا دعوٰی

محمد علی منگل 13 مئی 2025 00:00

میں نے پاکستان اور بھارت کے درمیان ایٹمی جنگ رکوا دی

واشنگٹن (اُردو پوائنٹ اخبارتازہ ترین۔ 12 مئی2025ء) امریکی صدر کا کہنا ہے کہ میں نے ایٹمی جنگ رکوا دی، پاکستان اور بھارت سے کہا کہ اگر کشیدگی ختم کردیں تو امریکا مزید تجارت کرے گا ، بصورت دیگر کوئی تجارت نہیں ہوگی۔ تفصیلات کے مطابق پاکستان اور بھارت کے درمیان کشیدگی کم ہونے کے بعد امریکی صدر ڈونلڈ ٹرمپ کا اہم بیان سامنے آیا ہے۔ پیر کے روز امریکی صدارتی محل وائٹ ہاوس میں پریس کانفرنس کرتے ہوئے امریکی صدر نے کہا کہ میں نے پاکستان اور بھارت کے درمیان ایٹمی جنگ رکوا دی، امریکہ نے پاکستان اور بھارت پر دباو ڈال کر دونوں ممالک کے درمیان جوہری تصادم کو روکا ہے، امریکی انتظامیہ کی مدد سے پاک بھارت جنگ بندی معاہدہ ممکن ہوا۔

ڈونلڈ ٹرمپ نے دعوٰی کیا کہ پاکستان اور بھارت کی قیادت سے کہا کہ اگر کشیدگی ختم کردیں تو امریکا کے ساتھ مزید تجارت کرے گا بصورت دیگر کوئی تجارت نہیں ہوگی، میں نے اگر جنگ سے باز نہ آئے تو کوئی تجارتی معاہدہ نہیں ہوگا۔

(جاری ہے)

امریکی صدر نے دعوٰی کیا کہ پاکستان اور بھارت نے جنگ تجارت کی وجہ سے بند کی ہے۔ میں نے تجارت کو اس انداز میں استعمال کیا جو پہلے کبھی نہیں ہوا تھا، میری یہ حکمت عملی کامیاب رہی اور پاکستان اور بھارت جنگ بندی پر آمادہ ہوگئے۔

امریکی صدر نے کہا کہ امید ہے دونوں ممالک مستقبل میں بھی اسی طرح ذمہ داری کا مظاہرہ کرتے ہوئے کشیدگی سے گریز کریں گے، دونوں ممالک کے درمیان تجارت کے لیے بھی مدد کرنے کو بھی تیار ہوں۔ امریکا تجارت کے حوالے سے بھارت اور پاکستان کی مدد کیلئے تیار ہے، بھارت کے ساتھ تجارتی معاہدے پر بات چیت کر رہے ہیں پاکستان کے ساتھ بھی کریں گے۔ واضح رہے کہ اس سے قبل اپنے ایک بیان میں امریکی صدر ڈونلڈ ٹرمپ نے مسئلہ کشمیر کے حل کیلئے بھی پاکستان اور بھارت کی مدد کرنے کی پیش کش کر دی۔