Live Updates

وزیراعلی اورکور کمانڈر بلوچستان سمیت دیگر کی سی پی او آفس کوئٹہ میں پولیس یادگار شہدا پرحاضری

شہدا ہمارے قومی ہیروز ہیں اور ان شہدا کی لازوال قربانیوں کی بدولت پاکستان میں امن وامان کا قیام ممکن ہوا،میرعبدالقدوس بزنجو

جمعرات 25 مئی 2023 20:14

وزیراعلی اورکور کمانڈر بلوچستان سمیت دیگر کی سی پی او آفس کوئٹہ میں ..

کوئٹہ(اُردو پوائنٹ اخبارتازہ ترین - این این آئی۔ 25 مئی2023ء) وزیر اعلی بلوچستان قدوس بزنجو اور کور کمانڈر 12 کورلیفٹیننٹ جنرل آصف غفور، صوبائی وزیر داخلہ میر ضیاء لانگو اور آئی جی پولیس بلوچستان عبدالخالق شیخ نے سی پی او آفس کوئٹہ میں پولیس یادگار شہدا پر پھولوں کا گلدستہ پیش کیا اور سلامی دی اور شہدا کے بلند درجات کیلئے دعا کی۔تقریب میں چیف سیکرٹری بلوچستان عبدالعزیز عقیلی ،اعلی سول و عسکری حکام کے علاوہ شہدا کے لواحقین نے شرکت کی۔

تقریب سے خطاب کرتے ہوئے وزیر اعلی بلوچستان میر عبدالقدوس بزنجو نے کہا کہ شہدا ہمارے قومی ہیروز ہیں اور ان شہدا کی لازوال قربانیوں کی بدولت پاکستان میں امن وامان کا قیام ممکن ہوا۔وزیر اعلیٰ بلوچستان نے کہا کہ پاکستان تحریک انصاف نے ملک کی سلامتی کے اداروں کے املاک اور شہدا کے یادگاروں پر حملہ کرکے پوری قوم کی دل آزاری کی۔

(جاری ہے)

وزیر اعلیٰ بلوچستان میر عبدالقدوس بزنجو نے کہا کہ سیکورٹی فورسز اور عوام کی قربانیوں کی بدولت آج بلوچستان میں امن کا سورج طلوع ہوچکا ہے اور سب سے پہلے ملک میں بلدیاتی انتخابات، پی ایس ایل نمائشی میچ اور انیس سال کے طویل عرصے کے بعد کوئٹہ بلوچستان میں 34 ویں نیشنل گیمز کا کامیاب انعقاد ان شہدا کی بدولت ممکن ہوا اور حکومت بلوچستان شہدا کے لواحقین کی ہرممکن معاونت اور سپورٹ کے لئے اقدامات کررہے ہیں۔

اس موقع پر وزیر اعلیٰ بلوچستان میر عبدالقدوس بزنجو اور کور کمانڈر 12 کور لیفٹیننٹ جنرل آصف غفور پولیس شہدا کے لواحقین سے گھل مل گئے۔