گوادر کے بجلی اور پانی کے دیرینہ مسائل حل ہو گئے، وزیراعلیٰ بلوچستان

حکومت نے صوبے کی ترقی اور خوشحالی کے لیے جرات مندانہ اور تاریخی اقدامات کیے ہیں، غیر ضروری چیک پوسٹوں کو ختم کر دیا گیا ہے،ہم گوادر کو اپنے بہترین وسائل کے مطابق سہولت فراہم کرنا چاہتے ہیں، میر عبدالقدوس بزنجو ن

منگل 30 مئی 2023 16:06

گوادر کے بجلی اور پانی کے دیرینہ مسائل حل ہو گئے، وزیراعلیٰ بلوچستان

اسلام آباد (اُردو پوائنٹ اخبارتازہ ترین - این این آئی۔ 30 مئی2023ء) وزیراعلیٰ بلوچستان میرعبدالقدوس بزنجو نے کہا ہے کہ گوادر کے بجلی اور پانی سے متعلق دیرینہ مسائل حل ہو گئے ہیں۔ صحافیوں سے گفتگو کرتے ہوئے انہوں نے کہا کہ حکومت نے صوبے کی ترقی اور خوشحالی کے لیے جرات مندانہ اور تاریخی اقدامات کیے ہیں، غیر ضروری چیک پوسٹوں کو ختم کر دیا گیا ہے اور گوادر کے بجلی اور پانی سے متعلق دیرینہ مسائل کو حل کر دیا گیا ہے، ہم گوادر کو اپنے بہترین وسائل کے مطابق سہولت فراہم کرنا چاہتے ہیں۔

گوادر پرو کے مطابق انہوں نے پاکستان ایران سرحد پر بارڈر مارکیٹ اور گوادر میں ایران گوادر پاور پراجیکٹ کے حالیہ افتتاح کو دونوں ممالک کے لیے 'مثبت علامت' قرار دیا۔ انہوں نے کہا تیل، گیس، کھانے پینے کی اشیاء اور توانائی کے شعبوں میں پاکستان اور ایران کے درمیان سالانہ تجارت اربوں روپے کی ہوتی ہے۔

(جاری ہے)

گوادر پرو کے مطابق وزیراعلیٰ نے کہا کہ پاکستان ایران بارڈر مارکیٹ منصوبہ پاکستان ایران کے تعاون سے سرحدی شہر ریکوڈک بارڈر پر مکمل کیا گیا۔

پاکستان ایران سرحد ایک تاریخی تجارتی راہداری تھی جو نہ صرف دونوں ممالک بلکہ پورے خطے کے لیے منفرد اہمیت کی حامل تھی۔ گوادر پرو کے مطابق وزیراعلیٰ بزنجو نے کہا کہ ایک پل کے طور پر چین پاکستان اقتصادی راہداری ( سی پیک ) بڑے پیمانے پر سرمایہ کاری کو راغب کر رہی ہے۔ انہوں نے کہا کہ چین کی جانب سے بھاری سرمایہ کاری کے علاوہ، دیگر ممالک بھی سی پیک منصوبوں میں سرمایہ کاری میں دلچسپی رکھتے ہیں۔