اسمبلیوں میں چہروں کی تبدیلی سے نہیں ملک کی حالت بدلنے سے کام ہوگا،سابق گورنرپنجاب چوہدری سرورکی شمولیتی تقریب سے خطاب

پشاور (اُردو پوائنٹ اخبارتازہ ترین - اے پی پی۔ 01 جون2023ء) سابق گورنر پنجاب اور مسلم لیگ(ق) کے رہنما چوہدری سرور نے کہا ہے کہ خیبر پختونخوا سے لوگوں کی مسلم لیگ(ق) میں شمولیت پر خوشی ہوئی جب سے پارٹی کا آرگنائزر بنا ہوں ہزاروں خاندانوں نے پارٹی میں شمولیت اختیار کی ہے۔ اسمبلیوں میں چہروں کی تبدیلی سے نہیں ملک کی حالت بدلنے سے کام ہوگا ۔ان خیالات کا اظہار سابق گورنر پنجاب اور مسلم لیگ (ق) کے رہنما چوہدری سرور نے پشاور پریس کلب میں شمولیتی تقریب کے دوران خطاب میں کیا ۔

اس موقع پر آل پاکستان مسلم لیگ کے صوبائی صدر ملک اورنگزیب نے مسلم لیگ(ق) میں شمولیت کا اعلان کیا اور اپنی کابینہ اور تمام ضلعی تنظیموں کے ساتھ مسلم لیگ(ق) میں شمولیت کی ۔ملک اورنگزیب کا کہنا تھا کہ الیکشن مہم میں ہمارا نعرہ کرپشن فری پاکستان ہوگا اس موقع پر مسلم لیگ (ق)کے رہنما چوہدری انصر اور عائشہ گلالئی بھی موجود تھیں ۔

(جاری ہے)

مسلم لیگ (ق) کے رہنما چوہدری سرور نے کہا کہ پارٹی میں کرپشن سے پاک لوگوں کو شامل کر رہے ہیں ،سیاست دان ایک دوسرے پر الزامات لگانے میں لگے ہوئے ہیں،عمران خان تو چور چور کا نعرہ لگا رہا تھا لیکن اس کے پاس کتنے چورتھے اس پرانہوں نے آنکھیں بند کی ہوئی تھیں،پی ڈی ایم سے بھی ملک سنبھل نہیں رہا ۔

غریب عوام پس کر رہ گئے ہیں،پی ڈی ایم اور پی ٹی آئی دونوں نے عوام کو کچھ نہیں دیا۔ سابق گورنر چوہدری سرور نے کہا کہ غریبوں کی حالت بدلنے کے لئے کام کرنا چاہئے جو مسلم لیگ(ق) کرے گی ۔ہماری جماعت اپنے کارکنان کو عزت اور اقتدار میں حصہ دیگی ،جب تک سزاءو جزاءکانظام نہیں ہوگا ملک آگے نہیں بڑھ سکتا،گورنر شپ کے دوران عوام کو سہولیات دیں ،پاکستان میں کسی چیز کی کمی نہیں لیکن قیادت کی کمی ہے،اس پارٹی میں ایک مشن کے تحت شامل ہوئے ہیں،میں پارٹی کو ایک ادارہ بنانا چاہتا ہو ں جو ملک کے مفاد کو مقدم رکھے،ہمارے تمام مسائل سیاسی ہیں، جن کا پائیدار حل بہت ضروری ہے چوہدری سرور نے کہا کہ عمران خان ان لوگوں کو قریب کرتے ہیں جو ان کو زیادہ نقصان پہنچاتے ہیں،جو لوگ انکے مشیر تھے آج وہی لوگ انکو چھوڑ رہے ہیں میں نے خان صاحب کو دو سال پہلے کہا تھا کہ جو راستہ آپ اختیار کر رہے یہ جیلوں تک لے جائےگا،خان صاحب کو سیاسی شہادت مل گئی تھی لیکن وہ نہیں سمجھا،وفاقی حکومت تو پھانسی کا پھندہ ہے لیکن خان صاحب اس کے پیچھے لگے رہے،عمران خان کو اس کے مشیروں نے غلط راستوں پر لگایا،اداروں کو اپنے دائرہ اختیار میں رہنا چاہئے۔

اس موقع پر مسلم لیگ (ق) کے رہنما چوہدری انصر نے کہا کہ چوہدری شجاعت حسین کی سربراہی میں الیکشن لڑیں گے،پاکستان کو معاشی طور پر مستحکم کرنا ہمارا منشور ہے،چوہدری شجاعت حسین کے واضح ہدایات ہیں کہ ایماندار اور کرپشن سے پاک لوگوں کو پارٹی میں شامل کریں الیکشن میں چوہدری سرور ہمیں لیڈ کرینگے اس موقع پر عائشہ گلالئی نے خطاب میں کہا کہ مسلم لیگ(ق) قائد اعظم محمد علی جناح کی جماعت ہے،75 سال گزرنے کے باوجود بھی ملک کی حالت سنبھل نہ سکی ،عوام کو پینے کا صاف پانی میسر نہیں،نہ ہی صحت و تعلیم کا نظام موجود ہے،ملک کی یہ حالت اقتدار کے مزے لوٹنے والے جماعتوں نے کیا ہے۔

عائشہ گلالئی نے کہا کہ خیبر پختونخوا کے عوام محب وطن ہے لیکن سیاسی جماعتوں نے انکے ساتھ بھی اچھا سلوک نہیں کیا،اقتدار میں آنے والے لوگوں نے خیبر پختونخوا کو بد امنی،دہشت گردی اور بم دھماکوں کے سوا کچھ نہیں دیا،مسلم لیگ(ق) کی قیادت صاف ستھری اور کرپشن سے پاک ہے۔،یہ حقیقی عوامی اور ترقی پسند جماعت ہے جو غریبوں کی سیاست کرتی ہے،اسلئے تو اس جماعت میں لوگ جوق در جوق شامل ہو رہے ہیں۔