ملک بھر میں یوم دفاع و شہدائے پاکستان 6 ستمبر کو قومی اور ملی جوش و جذبے سے منایا جائے گا

اسلام آباد (اُردو پوائنٹ اخبارتازہ ترین - اے پی پی۔ 05 ستمبر2023ء) ملک بھر میں یوم دفاع و شہدائے پاکستان )کل (6 ستمبر کو قومی اور ملی جوش و جذبے سے منایا جائے گا۔ یوم دفاع پاکستان قومی تاریخ کا درخشاں باب ہے ،اس دن پاکستان کی افواج نے ازلی دشمن بھارت کو عبرتناک شکست دے کر شجاعت و بہادری کی نئی تاریخ رقم کی۔ مادرِ وطن کی خاطر اپنی جانیں قربان کرنے والے شہدا ء اور ان کے خاندانوں کو خراج تحسین پیش کرنے کے لئے 6 ستمبر کو یومِ دفاع و شہداء منایا جاتا ہے۔

58سال قبل آج ہی کے دن ہماری مسلح افواج اورپوری پاکستانی قوم نے غیر معمولی جرأت اور بے مثال جذبے کا مظاہرہ کرتے ہوئے دشمن کے ناپاک عزائم کو ناکام بنادیا تھا۔ اس طرح جنگِ ستمبر ہماری تاریخ میں غیر متزلزل قومی عزم، پیشہ وارانہ مہارت اور جذبہ حب الوطنی و قربانی کی علامت کے طور پر ایک یادگار حیثیت رکھتی ہے۔

(جاری ہے)

اس روز مادرِ وطن کے بہادربیٹوں نے دشمن کے خلاف بے خوفی سے لڑتے ہوئے تاریخ کا روشن باب رقم کیا۔

آج پوری قوم ان شہداء کو خراج عقیدت پیش کرے گی جنہوں نے دفاعِ وطن کا فریضہ ادا کرتے ہوئے اپنی جانیں نچھاورکیں۔ اس کے ساتھ ساتھ شہداء کے خاندانوں کوبھی خراج تحسین پیش کیا جائے گا جنہوں نے مادرِ وطن کے دفاع کے لئے اپنے پیاروں کی قربانی دے کر ایک مثال قائم کی۔ پاکستانی قوم ہر سال 6 ستمبر کو یوم دفاع بڑے جوش اور جذبے کے ساتھ مناتی ہے تاکہ ہر طرح کے خطرات سے اپنے ملک کے دفاع کے قومی عزم کا اعادہ کیا جا سکے۔

58 سال پہلے، بھارت نے یکطرفہ طور پر پاکستان پر جنگ مسلط کی تھی۔ پاکستان کی مسلح افواج نے بھارتی جارحیت کا منہ توڑ جواب دیا جس کے نتیجے میں جارح بھارتی افواج کو شکست کا سامنا کرنا پڑا۔ 1965 کی جنگ میں جہاں پاکستان کی مسلح افواج نے اپنی بھرپور صلاحیتوں اور جرات و بہادری کا لوہا منوایا، پوری قوم دشمن کی جارحیت کے خلاف متحد ہو کر کندھے سے کندھا ملا کر کھڑی رہی۔

پاکستانی فنکاروں نے بھی حب الوطنی پر مبنی ملی نغموں سے حوصلے بلند کرنے، اتحاد اور قوت کے احساس کو فروغ دینے میں اہم کردار ادا کیا۔ ہماری افواج نے قوم کی مکمل حمایت سے پاکستان کے خلاف ناپاک عزائم کو ناکام بناتے ہوئے دشمن کو عبرتناک شکست دی۔ 1965 کی جنگ میں پاکستان کی فتح قومی جذبے اور اتحاد کی وجہ سے ممکن ہوئی جسے ہمیشہ یاد رکھا جائے گا۔ قوم ایک بار پھر اپنے جوش و جذبے کی تجدید کے لیے متحد ہو کر دشمن کو یہ واضح پیغام دے گی کہ پاکستان اپنی خودمختاری اور سالمیت کو لاحق کسی بھی خطرے کو ناکام بنانے کے لئے تیار اور پرعزم ہے۔