کراچی (اُردو پوائنٹ اخبارتازہ ترین - اے پی پی۔ 27 ستمبر2023ء)
وکلا نے ملک میں آئین کی بالادستی ، قانون کی حکمرانی ، سچ کی بلندی کے لئے ہمیشہ جدوجہد کی ہے اور قربانیاں دی ہیں جو کسی سے فراموش نہیں۔ اسی شعبے نے آپ کو تقویت عطا کی اور اسی سے آپ کو عزت ملی ہے لیکن ہمیں اس بات کو کبھی نہیں بھولنا چاہیے کہ ہمیں اپنا انداز پروفیشنل رکھنا ہے۔ یہ بات وزیراعلیٰ
سندھ جسٹس (ر) مقبول باقر نے بدھ کو بار کونسل کی تقریب کے موقع پر میڈیا سے بات کرتے ہوئے کہی۔
انہوں نے کہا کہ
وکلا اپنے کردار اور اخلاق کو بلند رکھیں تاکہ ان کی عزت اور توقیر میں اضافہ ہو۔انہوں نے کہا کہ یہ عزت اور توقیر میں اضافہ ہی ہے جو لوگوں کو طاقت عطا کرتی ہے۔ یہ آپ کو نہ صرف دنیاوی طاقت عطا کرتی ہے بلکہ آپ کی شخصیت میں نکھار بھی پیدا کرتی ہے اور آپ صحیح راستے پر گامزن ہوں گے۔
(جاری ہے)
آپ کو ہمیشہ اپنے اخلاق کو بلند رکھناہے۔ عدل و انصاف کے لیے کام کرنا ہے۔
نگراں وزیراعلیٰ
سندھ نے کہا کہ یہ انتہائی مسرت کا موقع ہے کہ میں آج یہا ں آپ کی خدمت میں حاضر ہوں اور اس تقریب کا حصہ ہوں ۔ یہ بار کونسل کی کاوش ،عمر سومرو کا تعاون اور جو کچھ ہم سے ہوسکا ہم نے کیا اور اس کے نتیجے میں جو سہولیات
وکلا کو میسر آئیں ،وہ اطمینان بخش ہیں ۔انہوں نے کہا کہ آپ کے مطالبات کے حوالے سے عمرسومرو صاحب نے ایک تفصیلی جائزہ پیش کیا ہے اور تقریبا سب کچھ وہ بتا چکے ہیں البتہ اسپتال کی تعمیر کے حوالے سے میں ضروری ہدایات جاری کروں گا اور اس کے بعد رپورٹ کی روشنی میں اس پر پیشرفت کی جائے گی البتہ ایک قانونی معاملہ درپیش ہوگا اور کوشش کریں گے کہ اس کو حل کریں اور اگر ہم اس معاملے کو حل نہ کرپائیں تو اس مسئلے کے حل کے لیے
الیکشن کمیشن سے رجوع کریں گے اور درخواست کریں گے کہ اس پراجیکٹ کے حوالے سے ہمیں خصوصی اجازت دیں۔
انہوں نے کہا کہ میں اور عمر سومر واس ایشو پر آپ کے نمائندے ہیں ۔ انہوں نے کہا کہ ہمیں جو کچھ حاصل ہوا وہ اس سرزمین سے ، اس سسٹم سے اور اس عدالتی نظام سے حاصل ہوا۔ انہوں نے کہا کہ یہاں ہم نے وکالت کی ہے اور اپنے طورپر لوگوں کی خدمت کی اور آپ کی دعائوں کے سبب اللہ نے ہمیں عزت بخشی۔ انہوں نے کہا کہ بطور
چیف جسٹس میں نے
سپریم کورٹ میں فرائض انجام دیئے ہیں اور 21 سال جج کے فرائض انجام دیتا رہا ہوں اور اس عرصے میں پوری کوشش کی کہ آئین کی بالادستی اور قانون کی حکمرانی قائم ہو۔
انہوں نے کہا کہ بار سے
میرا بہت گہرا رشتہ ہے، جس کے آپ سب گواہ ہیں۔ میں آپ کا ہوں، یہ
میرا گھر ہے ۔ اس کے لیے جو کچھ بھی ہم کرسکتے ہیں، وہ کریں گے ۔ انہوں نے کہا کہ بار کے لیے، اپنے ملک اور پورے صوبے کے لیے جتنا بھی کریں وہ کم ہے ۔انہوں نے کہا کہ
وکلا کسی بھی سوسائٹی کا ایک اہم جز ہوتے ہیں ۔ آپ کا ایک مقام ہے ،آپ ماہرِ قانون ہیں ۔ پرخلوص، بااخلاق و عاجز رہیں اور علم حاصل کرتے رہیں اور اپنے مہارت کو بڑھانے کی کوشش کریں تو اللہ تعالی بھی آپ کی مدد کرے گا اور آپ آگے بڑھتے ہی جائیں گے ۔
انہوں نے کہا کہ اس بات کی آپ سب زندہ مثالیں ہیں، کیونکہ آپ میں سے بعض لوگوں نے بالکل ہی پسماندگی سے اپنے شعبے کاآغاز کیا اور بعض نے نامساعد حالات کا سامنا کیا ہوگا اور آج وہ یہاں اس مقام پر پہنچے ہیں، اللہ تعالی ٰنے آپ سب کو عزت دی اور سب کچھ عطا کیا۔ اللہ تعالی ٰکی ذات پر بھروسہ رکھتے ہوئے ، اچھے اخلاق کا مظاہر کرتے ہوئے اور اپنے اقدار کو برقرار رکھتے ہوئے اپنی کوشش و کاوش جاری رکھیں اور اس کے لیے آپ کی جو یہ بار کونسل ہے یہ بہت اہم ادارہ ہے اور اسے فروغ دینے میں بار کونسل کا بہت اہم کردارہے۔
انہوں نے کہا کہ میں سمجھتا ہوں جو آپ کی لیڈر شپ ہے جو آج بیٹھی ہوئی ہے اور جو لوگ آئندہ آئیں گے انشا مزید فعال کردار اداکریں گے۔ اور آپ نے اپنے آپ کو ثابت کیا ہے اور آپ میں سے اکثر جج صاحبان بنے ، جنہوں نے کبھی آپ کوشرمندہ ہونے نہیں دیا اور آپ کا سر فخر سے بلند رکھنے میں بھی ان کا تعاون اور مدد رہا۔ اسی امید کے ساتھ آپ سب پھلتے پھولتے رہیں اور پروفیشنلی بھی اپنے معیار کو بلند کریں ، خود کو معاشرے کا اچھا انسان ثابت کریں اور اللہ تعالی ہم سب کو اس بات کی توفیق دے کہ ہم اس ملک و قوم اور آپ کی خدمت کرتے رہیں ۔
اس موقع پر وزیرقانون عمر سومرو اور نعیم قریشی نے بھی تقریب سے خطاب کیا۔قبل ازیں نگراں وزیراعلی
سندھ جسٹس (ر) مقبول باقر کی آمد پر
سندھ بار کائونسل کے عہدیداروں نے ان کا استقبال کیا۔ اس موقع پر نگراں وزیراعلی
سندھ کے ہمراہ
وزیر قانون عمر سومرو بھی تھے۔ جہاں نگراں وزیراعلی
سندھ نیبار کانسل کے نئے دفتر کا افتتاح کیا ۔
