"شاہد خاقان عباسی اور مفتاح اسماعیل خود کو ضائع کریں گے"

مصطفی نواز کھوکھر، شاہد خاقان عباسی اور مفتاح اسماعیل بہت اچھے لوگ ہیں، میں چاہتا ہوں ایسے لوگ پارٹیوں میں ہی رہیں، رانا ثنا اللہ کی گفتگو

دانش احمد انصاری جمعرات 28 ستمبر 2023 00:08

لاہور (اردوپوائنٹ اخبارتازہ ترین۔ 26 ستمبر 2023ء) سینئر لیگی رہنما رانا ثنا اللہ نے کہا ہے کہ شاہد خاقان عباسی اور مفتاح اسماعیل خود کو ضائع کریں گے۔ انہوں نے نجی ٹی وی چینل ہم نیوز کے پروگرام میں گفتگو کرتے ہوئے کہا کہ مصطفی نواز کھوکھر، شاہد خاقان عباسی اور مفتاح اسماعیل بہت اچھے لوگ ہیں، میں چاہتا ہوں ایسے لوگ پارٹیوں میں ہی رہیں۔ ادھر لیگی رہنماخرم دستگیر نے بھی نئی سیاسی جماعت کے حوالے سے کہا ہے کہ دنیا میں اب آئیڈیالوجیز نئی نہیں آرہیں، تمام تجربہ کار لوگ مختلف جماعتوں میں رہے ہیں، جب پرانے لوگ نئی جماعت بناتے ہیں تو سوال اٹھیں گے، سوال ہوگا کہ پہلے اقتدار میں تھے تو آپ نے کیا کیا۔

خرم دستگیر نے کہا کہ 2013 سے 2018 کامیاب ترین حکومت تھی، اس دوران مہنگائی، لوڈشیڈنگ اور دہشت گردی کا خاتمہ ہوا۔

(جاری ہے)

ان کا کہنا تھا کہ یہ درست نہیں کہ مہنگائی کی وجہ سےملک تباہ ہوگیا ہے، مشکلات ضرور ہیں لیکن تباہی کا تاثر دینا درست نہیں، آج کے حالات 2013 سے مختلف نہیں ہیں۔ ہم نیوز کے پروگرام میں نگران وزیراعلی داخلہ کی وضاحت سے متعلق سوال کا جواب دیتے ہوئے رانا ثنا اللہ نے کہا کہ نگران وزیرداخلہ سرفراز بگٹی کا بیان سیاق و سباق سے ہٹ کر چلایا گیا، نگران وزیرداخلہ نے کہا نواز شریف کیساتھ آئین و قانون کے تحت سلوک ہو گا۔

نگران وزیر داخلہ کی وضاحت کو ن لیگ نےقبول کیا ہے ، سرفراز بگٹی نے کہا میرے پورے انٹرویو کو نہیں سنا گیا۔ ردعمل پر سرفراز بگٹی سے رابطہ کیا تھا۔ لاہورمیں مینار پاکستان پر جلسے کے حوالے سے رانا ثنا اللہ نے کہا کہ 10لاکھ لوگوں کا نکلنا کوئی بڑا فگر نہیں ہیں۔ انہوں نے کہا کہ چیئرمین پی ٹی آئی کی ذات سے کوئی نفرت نہیں ہے، چیئرمین پی ٹی آئی کے خیالات کے بارے میں کہتا رہا ہوں کہ سیاست کیلئے ناسور ہے، چیئرمین پی ٹی آئی کے ساتھ سیاست چل ہی نہیں سکتی۔

اس وقت چیئرمین پی ٹی آئی کو 15سے 18فیصد لوگ ووٹ دینا چاہتے ہیں۔ رہنما ن لیگ کا سابق وزیراعلی پنجاب چودھری پرویز الہی سے متعلق کہنا تھا کہ لوٹ مار کی بھی کوئی حد ہوتی ہے ، کیسے ڈالر جہاز میں بھر کر لے گئے، پرویز الہٰی سے بھی کوئی پوچھے جو اتنی لوٹ مار کی ، جس بھی شخص کو پکڑا جائے اسے سامنے لانا چاہیے۔ رانا ثنا اللہ نے کہا ہے کہ ہم نے نواز شریف کی واپسی پر پوری تیاری کر رکھی ہے، نواز شریف کی ضمانت کیلئے اسلام آباد ہائیکورٹ میں درخواست دی جائے گی، 2008میں جو حالات تھے جنرل کیانی کے آنے سے مکمل تبدیل ہو گئے تھے۔