اسلام آباد شہر کی ترقی اور عوام کی سہولیات کے لئے الیکشن لڑنے کا فیصلہ کیا ہے ، ذیشان شاہ

جمعہ 1 دسمبر 2023 23:28

اسلام آباد (اُردو پوائنٹ اخبارتازہ ترین - اے پی پی۔ 01 دسمبر2023ء) سابق ڈپٹی میئرسید ذیشان شاہ نے کہا ہے کہ اسلام آباد شہر کی ترقی اور عوام کی سہولیات کے لئے این اے 46 سے الیکشن لڑنے کا فیصلہ کیا ہے ، جمعہ کو یہاں سینئر صحافیوں سے بات چیت کرتے ہوئے انہوں نے کہا کہ ان شاءاللہ مسلم لیگ ن پورے پاکستان میں بھاری اکثریت سے جیتے گی۔

(جاری ہے)

انہوں نے کہا کہ اپنے حلقہ اور اسلام آباد کے عوام کی فلاح و بہبود کے لئےکام کرنا اولین ترجیح ہے،قائد مسلم لیگ (ن)نواز شریف، صدر شہباز شریف اور مریم نواز کی قیادت میں الیکشن میں کامیابی ملے گی، ہم نے اسلام آباد میں 160 ارب روپے کے ترقیاتی کام شروع کرائے ،مارگلہ ایونیو کی ایکسٹینشن اور انڈر پاس کی منظوری لی ،تمام قریبی آبادیوں کو مرکزی شاہراہوں سے منسلک کیا ہے، 35 کروڑ روپے کی لاگت سے سپورٹس انکلیو شاہ اللہ دتہ میں بنا رہے ہیں، روایتی اور ثقافتی کھیلوں کی ترویج کے لئے بھی منصوبے شروع کئے ہیں۔

انہوں نے کہا کہ اولمپک سٹی کا قیام بھی اسلام آباد میں عمل میں لایا جارہا ہے، ہماری سیاست کا مقصد عوام کی خدمت ہے، عوام کی فلاح و بہبود کے منصوبوں کو آگے بڑھایا جائے گا،اسلام آباد کے مقامی لوگوں کے مسائل کا بھی ترجیح ہے، پینے کے صاف پانی اور بنیادی سہولیات کی فراہمی ترجیح ہے۔