پشاور بڑی تباہی سے بچ گیا،سکیورٹی فورسز کی بڑی کامیابی ،ٹی ٹی پی کا اہم دہشت گرد گرفتار

ہفتہ 2 دسمبر 2023 21:58

راولپنڈی(اُردو پوائنٹ اخبارتازہ ترین - آن لائن۔ 02 دسمبر2023ء) سکیورٹی اداروں نے ایک کارروائی کے دوران تحریک طالبان پاکستان کے ایک اہم دہشت گردکو گرفتار کرلیا ہے ،دفاعی سکیورٹی ذرائع نے بتایا کہ خیبر پختونخواہ کے علاقے پشاور کو بڑی تباہی سے بچا لیا گیا ہے، سیکورٹی فورسز نے مردان ریجن میںکارروائی کرتے ہوئے بڑی کامیابی حاصل کرلی ہے، ٹی ٹی پی کے اہم دہشت گرد کو کامیاب آپریشن کے بعد گرفتار کر لیا گیاہے، سیکورٹی فورسز کے کامیاب آپریشن کے باعث پشاور دہشت گردی کی بڑی کاروائی سے بچ گیا ،سکیورٹی ذرائع کے مطابق آپریشن کے دوران گرفتار ہونے والے ٹی ٹی پی کے انتہائی مطلوب دہشت گرد نے دوران تفتیش اہم انکشافات کئے ہیں ، گرفتار دہشت گرد کی نشان دہی پر ضلع خیبر سے بڑی تعداد میں گولا بارود، خودکش جیکٹس میں استعمال ہونے والا بارودی مواد ، ڈیٹونیٹر اور اسلحہ برآمد کر لیا،ذرائع کے مطابق ٹی ٹی پی کے دہشت گرد آنے والے دنوں میں پشاور میں بڑی دہشت گردی کی کاروائیوں کی منصوبہ بندی کر رہے تھے جس کو کامیاب آپریشن کے بعد ناکام بنا دیا گیا ہے اور دشمن کے عزائم خاک میں مل گئے ہیں ،پاک فوج کسی صورت بھی کسی ملک دشمن کو کامیاب نہیں ہونے دے گی اور آخری دہشت گرد کے خاتمے تک آپریشن جاری رہیں گی