آنے والے دنوں میں اہم امریکی عہدیدار پاکستان کے دورے کریں گے،ترجمان دفتر خارجہ

اتوار 3 دسمبر 2023 18:35

اسلام آباد (اُردو پوائنٹ اخبارتازہ ترین - این این آئی۔ 03 دسمبر2023ء) ترجمان دفتر خارجہ ممتاز زہرا بلوچ نے کہا ہے کہ آنے والے دنوں میں اہم امریکی عہدیدار پاکستان کے دورے کریں گے۔ترجمان دفترخارجہ ممتاز زہرا بلوچ نے اپنے بیان میں کہا کہ پاکستان اور امریکا کے درمیان متعدد معاملات پر مشاورت جاری ہے، مشاورتی عمل کو آگے بڑھانے کے لیے دوروں کا تبادلہ بھی ہوتا ہے۔

(جاری ہے)

ممتاز زہرا بلوچ نے کہاکہ آنے والے دنوں میں اہم امریکی عہدیداروں کے پاکستان کے دورے بھی ہو رہے ہیں، اسسٹنٹ سیکرٹری برائیآبادی، پناہ گزین و مائیگریشن پاکستان کا دورہ کریں گی۔انہوں نے بتایا کہ جولیٹا والس نوئیس4 سے 6 دسمبر تک پاکستان کا دورہ کریں گی، افغانستان کیلئے نمائندہ خصوصی ٹام ویسٹ 7 تا 9 دسمبر اسلام آباد کا دورہ کریں گے جبکہ پرنسپل ڈپٹی اسسٹنٹ سیکرٹری الزبتھ ہورسٹ کا دورہ 9 سے 12 دسمبر تک ہو گا۔ترجمان دفتر خارجہ نے کہاکہ امریکی عہدیداروں کے دورے صرف افغانستان کے ساتھ مسائل تک ہی محدود نہیں ہیں، یہ دورے امریکا کے ساتھ افغانستان کی صورتحال سمیت متعدد مسائل پر جاری مذاکرات کا حصہ ہیں۔