عمران اشرف کی سابقہ اہلیہ نے سیاسی رہنما سے دوسری شادی کر لی

کرن اشفاق کے شوہر حمزہ علی چوہدری سے متعلق تفصیلات سامنے آ گئیں، شادی کی تصاویر سوشل میڈیا پر وائرل ہو گئیں

مقدس فاروق اعوان پیر 4 دسمبر 2023 12:17

عمران اشرف کی سابقہ اہلیہ نے سیاسی رہنما سے دوسری شادی کر لی

لاہور( اُردو پوائنٹ اخبارتازہ ترین ۔ 04 دسمبر 2023ء ) معروف اداکار اور میزبان عمران اشرف کی سابقہ اہلیہ اداکارہ کرن اشفاق نے سیاسی رہنما سے دوسری شادی کر لی۔کرن اشفاق کے دوسرے شوہر ر حمزہ علی چوہدری سے متعلق تفصیلات سامنے آ گئیں۔حمزہ علی چوہدری پاکستان پیپلز پارٹی (پی پی پی) کے فوکل پرسن اور سیاسی مشیر ہیں۔حمزہ علی چوہدری پیشے کے اعتبار سے ایک کارپوریٹ وکیل ہیں۔

حمزہ علی کے انسٹاگرام کے بائیو کے مطابق وہ ماضی میں پروفیشنل کرکٹ بھی کھیل چکے ہیں۔حمزہ کے انسٹاگرام اکاؤنٹ پر نظر ڈالی جائے تو واضح ہوتا ہے کہ وہ سیاسی طور پر کافی متحرک ہیں اور ہر سرگرمی کا حصہ ہوتے ہیں، انہوں نے اپنے اکاؤنٹ پر چیئرمین بلاول بھٹو سمیت آصف زرداری، فریال تالپور ، شہلا رضا اور دیگر اہم سیاسی رہنماؤں کے ساتھ تصاویر شیئر کی ہیں۔

(جاری ہے)

کرن اشفاق کی شادی کی خبر گزشتہ روز سامنے آئی تھی جس کے بعد اداکارہ نے اتوار کی شام خود تصدیق کردی اور انسٹاگرام اکاؤنٹ پر اپنے نکاح کی متعدد تصاویر جاری کیں۔ نکاح کی یہ تقریب گزشتہ روز لاہور میں حمزہ علی چوہدری کی رہائشگاہ پر منعقد کی گی جس میں قریبی رشتے دار سمیت دوست احباب نے شرکت کی۔دلہا اور دلہن نے اس تقریب کے لیے سفید رنگ کے جوڑے کا انتخاب کیا، کرن اشفاق نے سفید رنگ کا چوڑی دار پاجامہ اور کرتا پہنا۔

اس کے علاوہ نکاح کی کئی اور ویڈیوز بھی سوشل میڈیا کی زینت بنی ہوئی ہیں جس میں اداکارہ قبول ہے کہہ رہی ہیں اور پھولوں کی چادر میں انٹری لے رہی ہیں۔ کرن اشفاق نے انسٹاگرام اکاؤنٹ پر مہندی کی تقریب کی تصویر بھی شئیر کی تھی جس میں دیکھا جاسکتا ہے کہ دونوں کے ہاتھوں اور چہرے پر ہلدی لگی ہے۔

اس کے علاوہ کرن کے شوہر حمزہ نے بھی اپنے انسٹاگرام پر اسی تقریب کی ایک اسٹوری شیئر کی جس پر انہوں نے الحمداللہ لکھا۔

خیال رہے کہ اداکار عمران اشرف اور ماڈل کرن اشفاق نے 2018ء میں شادی کی تھی۔دونوں کا ایک بیٹا بھی ہے۔سال 2018 میں رشتہ ازدواج میں منسلک ہونے والی اس جوڑی نے سال 2022 میں علیحدگی اختیار کر لی تھی ،ان کے بیٹے کا نام روحام ہے۔