ریاستی تشخص، قومی وقار، عوامی حقوق کا تحفظ اور پسماندہ علاقوں کی تعمیر وترقی پیپلز پارٹی کے منشور کی اولین ترجیحات میں شامل ہے ، چوہدری لطیف اکبر

منگل 5 دسمبر 2023 21:24

مظفر آباد (اُردو پوائنٹ اخبارتازہ ترین - اے پی پی۔ 05 دسمبر2023ء) آزادجموں وکشمیر قانون ساز اسمبلی کے سپیکر چوہدری لطیف اکبر نے کہا ہے کہ ریاستی تشخص، قومی وقار، عوامی حقوق کا تحفظ، پسماندہ علاقوں کی تعمیر وترقی، صحت، تعلیم اور روزگار کی فراہمی پیپلز پارٹی کے منشور کی اولین ترجیحات میں شامل ہے، ہمیں مل کر باہمی مشاورت اور اعتماد سازی سے نظریاتی فراخدلی کا مظاہرہ کرتے ہوئے ایک دوسرے کا جائز حق تسلیم کرنا ہے، اتحادی حکومت کے وزیر اعظم چوہدری انوار الحق بہتر انداز سے طرز حکمرانی کو فروغ دینے کیلئے اصلاحات کا نفاذ کرنے میں مسلسل محنت کر رہے ہیں ۔

ان خیالات کا اظہار انہوں نے اسمبلی سیکرٹریٹ میں اپنے آفس چمبر میں وزرا اور ممبرانِ اسمبلی سے ملاقاتوں میں بات چیت اور میڈیا سے گفتگو کرتے ہوئے کیا۔

(جاری ہے)

انہوں نے کہا کہ تمام حلقوں میں اتحادی جماعتوں کی پارلیمانی پارٹی کو اعتماد میں لیکر یکساں فنڈز کی فراہمی سے عوام کی بنیادی ضروریات زندگی پر توجہ مرکوز کی جا رہی ہے ۔ سپیکر قانون ساز اسمبلی چوہدری لطیف اکبر نے کہا کہ ہماری خلوص نیت سے کوشش ہے کہ وزیراعظم چوہدری انوارلحق کو بھرپور سیاسی عوامی انتظامی سطح پر توانا کیا جائے تاکہ وہ قومی ریاستی امور کو خوش اسلوبی سے پایہ تکمیل تک پہنچا سکیں ۔

دریں اثنا میڈیا سے گفتگو کرتے ہوئے چوہدری لطیف اکبر نے کہا کہ نظریاتی کارکنوں میں جوش و جذبہ پیدا ہوا ہے ، سیاسی مخالفین بھی معترف ہیں کہ پیپلزپارٹی اور اس کی قیادت اپنے کارکنوں کی عزت و تکریم کو ہر فورم پر مقدم رکھتی ہے ۔ ایک سوال کے جواب میں انہوں نے کہا کہ اٹھ فروری کو پاکستان میں ہونے والے عام انتخابات میں پیپلز پارٹی کے نامزد امیدواران چاروں صوبوں سے سرپرائزنگ نتائج حاصل کریں گے ۔

سپیکر اسمبلی چوہدری لطیف اکبر نے کہا کہ بھارتی وزیراعظم نریندر مودی مقبوضہ جموں کشمیر میں تحریک آزادی کشمیر کو کچلنے کیلئے نو لاکھ قابض افواج پیرا ملٹری فورسز اور کالے قوانین کا سہارا لے رہا ہے ، اسی طرح اسرائیل نے فلسطین میں انسانیت سوز مظالم کی تمام حدیں پھلانگ دی ہیں ، بھارت اور اسرائیل دونوں قابض دہشت گرد ممالک ہیں جنہوں نے جنیوا کنونشن سمیت تمام معاہدوں کو روند ڈالا ہے جس کی وجہ سے عالمی امن کو خطرہ لاحق ہو چکا ہے ، عالمی برادری فوری اپنا کلیدی کردار ادا کرے۔