اے این ایف کی منشیات اسمگلنگ کے خلاف کارروائیاں، 1 ہفتے میں 6 خواتین گرفتار

بدھ 6 دسمبر 2023 22:49

لاہور (اُردو پوائنٹ اخبارتازہ ترین - آن لائن۔ 06 دسمبر2023ء) اے این ایف کی کارروائیوں میں گزشتہ ایک ہفتے کے دوران منشیات اسمگلنگ میں ملوث 6 خواتین گرفتار کی گئی ہیں۔ترجمان اے این ایف کے مطابق 5 کارروائیوں کے دوران گرفتار خواتین سے 26 کلوگرام سے زائد منشیات برآمد کی گئیں۔ گرفتار خواتین بین الصوبائی اور بین الاقوامی سطح پر منشیات اسمگلنگ میں ملوث ہیں۔

خواتین کا تعلق مختلف منشیات اسمگلنگ گروہوں کے ساتھ ہونے کا انکشاف ہوا ہے۔ منشیات اسمگلنگ کیلئے خواتین کو استعمال کیا جانا خطرناک عمل ہے۔ اے این ایف خواتین کے تحفظ کو یقینی بنانے کے لیے تمام وسائل بروئے کار لا رہی ہے۔ علامہ اقبال انٹرنیشنل ایئرپورٹ پر خاتون کے پیٹ سے 87 ہیروئن بھرے کیپسول برآمد ہوئے۔

(جاری ہے)

لاہور کی رہائشی سمیرہ نامی ملزمہ بذریعہ عمان ایئرلائن کی پرواز نمبر WY-342 عمان کیلئے روانہ ہو رہی تھی۔

ملتان انٹرنیشنل ائیرپورٹ پر خاتون سمیت 2 ملزمان کو گرفتار کیا گیا۔ ساہیوال کی رہائشی اقصی اور نور احمد کے بیگ سے 855 گرام آئس برآمد ہوئی۔ ملزمان قطر ایئرویز کی پرواز نمبر QR-617 کے ذریعے قطر کیلئے روانہ ہو رہے تھے۔ علامہ اقبال انٹرنیشنل ایئرپورٹ پر خاتون کے بیگ سے 1.942 کلوگرام آئس برآمد کی گئی۔ کراچی کی رہائشی سعدیہ نامی ملزمہ گلف ایئرویز کی پرواز نمبر GF-0767 کے ذریعے بحرین کیلئے روانہ ہو رہی تھی۔

کراچی کے علاقے اورنگی ٹاون میں کارروائی کے دوران 2 خواتین کو گرفتار کیا گیا۔ کراچی کی رہائشی صائمہ اور شریفاں بی بی کے قبضے سے 22.8 کلوگرام چرس برآمد کی گئی۔ چونگی نمبر 26، اسلام آباد کے قریب پشاور کی رہائشی امینہ نامی خاتون کو گرفتار کیا گیا۔ ملزمہ کے قبضے سے 500 گرام چرس اور 250 گرام آئس برآمد کی گئی۔