شہباز شریف سے بلوچستان، پنجاب اور صوبہ سندھ سے تعلق رکھنے والے پارٹی رہنمائوں کی ملاقات

لاہور (اُردو پوائنٹ اخبارتازہ ترین - اے پی پی۔ 06 دسمبر2023ء) سابق وزیر اعظم اور پاکستان مسلم لیگ ن کے صدر شہباز شریف سے بلوچستان، پنجاب اور صوبہ سندھ سے تعلق رکھنے والے پارٹی رہنمائوں نے ملاقات کی ۔ مسلم لیگ (ن) بلوچستان کے صدر جعفر خان مندوخیل، سابق وزیر اعلی جام کمال، خوشاب سے سابق رکن قومی اسمبلی اور سابق وفاقی وزیر سمیرا ملک،کراچی سے پارٹی راہنمائوں خواجہ شعیب اور صالحین تنولی نے پارٹی صدر سے ملاقات کی۔

پارٹی کے سینئر رہنما سردار ایاز صادق بھی ملاقات میں موجود تھے۔ ملاقات میں عام انتخابات کی تیاریوں اور پارٹی سرگرمیوں پر گفتگو ہوئی جبکہ بلوچستان میں پارٹی امور اور عام انتخابات کی تیاریوں پر بھی مشاورت ہوئی۔ ملاقات میں بلوچستان میں پارٹی کو مزید مضبوط اور فعال بنانے کے لئے تجاویز پر غور ہوا۔

(جاری ہے)

اس موقع پرشہباز شریف نے جعفر مندو خیل کی بلوچستان میں پارٹی کو مضبوط بنانے کے لئے کوششوں کو سراہا جبکہ سابق وزیر اعلی جام کمال نے پاکستان مسلم لیگ (ن) کے قائد محمد نواز شریف کی ایون فیلڈ ریفرنس میں بریت پر شہباز شریف کو مبارک دی۔

شہباز شریف نے نیک تمناں کے اظہار پر جام کمال کا شکریہ ادا کیا۔ ملاقات میں صوبہ سندھ میں پارٹی کو مزید فعال بنانے اور عام انتخابات کی تیاریوں کے حوالے سے تبادلہ خیال ہوا۔ اس موقع پر گفتگو کرتے ہونے شہباز شریف نے کہا کہ مسلم لیگ (ن) چاروں صوبوں، گلگت بلتستان اور آزاد جموں و کشمیر کی سب سے بڑی وفاقی جماعت ہے، مسلم لیگ (ن) وفاق کی مضبوطی اور ترقی کی علامت ہے، شہباز شریف نے کہا کہ بلوچستان قومی ترقی اور حقوق کی فراہمی کے ایجنڈے میں مسلم لیگ(ن) کی ہمیشہ اولین ترجیح رہی ہے اور رہے گی، پاکستان کی ترقی کے لئے بلوچستان کی ترقی ایک لازمی تقاضا ہے جسے صرف مسلم لیگ(ن) ہی پورا کرسکتی ہے۔