سی ٹی ڈی مہمند ریجن نے کارروائی کر کے دہشت گرد اور 6 سہولت کاروں کو گرفتار کر لیا

پیر 11 دسمبر 2023 17:53

مہمند (اُردو پوائنٹ اخبارتازہ ترین - این این آئی۔ 11 دسمبر2023ء) سی ٹی ڈی مہمند ریجن نے کارروائی کر کے دہشت گرد اور 6 سہولت کاروں کو گرفتار کر لیا۔ڈی آئی جی سی ٹی ڈی عمران شاہد کے مطابق دہشت گرد اور سہولت کاروں کا تعلق کالعدم تنظیم سے ہے۔انہوں نے بتایا کہ ملزمان سے بھتے میں لیے گئے بینک چیکس بھی برآمد ہوئے۔ڈی آئی جی سی ٹی ڈی عمران شاہد نے بتایا کہ ملزمان سے 6 لاکھ روپے اور 30 لاکھ روپے کے چیکس جبکہ ایک گاڑی بھی برآمد ہوئی۔

(جاری ہے)

انہوںنے کہاکہ ملزمان لوگوں کو افغانستان کی سمز سے کال کرتے تھے، ان کے کئی نجی بینکوں میں اکاونٹس تھے۔ڈی آئی جی سی ٹی ڈی عمران شاہد نے بتایا ہے کہ گروپ میں30 ملزمان ہیں، 20 کی نشاندہی ہو گئی ہے، گروپ کے 3 دہشت گردوں کو جیل بھیج دیا گیا ہے جبکہ 3 زیرِ تفتیش ہیں۔انہوں نے بتایا کہ افغانستان کے 2 باشندے بھی گروپ میں شامل ہیں جن میں سے ایک گرفتار ہوچکا ہے۔ڈی آئی جی سی ٹی ڈی عمران شاہد کے مطابق دہشت گرد گروپ کا کمانڈر اعتبار شاہ افغانستان میں روپوش ہے، بھتہ خورگینگ کے مجموعی طور پر 8 افراد گرفتار ہیں۔