این اے 75 سے آزاد امیدوار دانیال عزیز چوہدری گرفتار

دانیال عزیز کو زبردستی گاڑی میں ڈالا گیا، دانیال عزیز پر تشدد بھی ہوا۔اہلیہ کا دعویٰ

مقدس فاروق اعوان جمعرات 8 فروری 2024 14:34

این اے 75 سے آزاد امیدوار دانیال عزیز چوہدری گرفتار

نارووال( اُردو پوائنٹ اخبارتازہ ترین ۔ 08 فروری 2024ء ) این اے 75 سے آزاد امیدوار دانیال عزیز چوہدری کو گرفتار کر لیا گیا۔آج دانیال عزیز نے ووٹ بھی کاسٹ کیا۔پولیس نے دانیال عزیز کو گرفتار کر لیا۔اس حوالے سے ان کی اہلیہ مہناز اکبر عزیز کا موقف بھی سامنے آیا ہے۔دانیال عزیز کی اہلیہ کا کہنا ہے کہ دانیال عزیز کو زبردستی گاڑی میں ڈالا گیا۔دانیال عزیز کو موڑ سلہریاں پر ناکے سے گرفتار کیا گیا۔

انہوں نے دعویٰ کیا کہ دانیال عزیز پر تشدد بھی کیا گیا ہے۔قبل ازیں الیکشن کمیشن نے ضابطہ اخلاق کی خلاف ورزی پر دانیال عزیز امیدوار این اے 75نارووال کو نوٹس جاری کیا تھا۔الیکشن کمیشن نے کیس کی سماعت 10فروری 2024ء کو الیکشن کمیشن میں مقر ر کی۔ ۔ ترجمان کے مطابق الیکشن کمیشن نے یہ فیصلہ کیا کہ دانیال عزیز اگر جنرل الیکشن 2024 میں کامیاب قرار پاتے ہیں تو اٴْنکا حتمی نوٹیفکیشن کا اجراء الیکشن کمیشن کے فیصلے سے مشروط ہو گا۔

(جاری ہے)

الیکشن کمیشن نے یہ فیصلہ ڈسٹرکٹ مانیٹرنگ آفیسر نارووال کی رپورٹ کی روشنی میں کیا ہے جس میں یہ کہا گیا ہے کہ مذکورہ بالا امیدوار بار بار ضابطہ اخلاق کی خلاف ورزی کررہے ہیں اور ڈسٹرکٹ مانیٹر نگ آفیسر کیجاری کردہ نوٹس کا نہ تو جواب دیتے ہیں اور نہ حاضر ہوتے ہیں۔انہیں ضابطہ اخلاق کی خلاف ورزی پر50 ہزار روپے جرمانہ کیا گیا جو انہوں نے ادا نہیں کیا جس بنا پران کے خلاف قانونی کاروائی عمل میں لائی جا ئے۔

یہاں واضح رہے کہ ن لیگ کا ٹکٹ نہ ملنے پر دانیال عزیز نے بطور آزاد امیدوار الیکشن میں حصہ لینے کا اعلان کیا تھا۔دانیال عزیز نے کہا تھا کہ احسن اقبال نے ماضی میں لوگوں کو مریم نواز کے جلسے میں شرکت سے روکا تھا۔شکرگڑھ میں میڈیا سے گفتگو کرتے ہوئے دانیال عزیز نے کہا کہ 2018ء میں بڑے لیڈروں نے جلسے سے انکار کیا مگر ہم نے کروا دیا۔ انہوں نے کہا کہ نوازشریف جیل میں تھے تو میں نے ظفروال میں مریم نواز کا جلسہ کروایا تھا، جبکہ احسن اقبال لوگوں کو جلسے میں شرکت سے روکتے رہے۔ انہوں نے کہا کہ احسن اقبال اوران کا ایم پی اے یا کوئی رشتے دار مریم کے جلسے میں نہیں تھا،مشکل دن تھے تب طے ہونا تھا لوٹا کون ہے اورساتھی کون ہے۔