نواز شریف فضل الرحمان کو منانے ان کی رہائش گاہ پہنچ گئے

قائد ن لیگ نے سربراہ جے یو آئی کو حکومت میں شامل ہونے کی دعوت دیدی،ن لیگ کے نامزد وزیراعظم اور صدر مملکت کا ووٹ بھی مانگا

فیصل علوی جمعہ 1 مارچ 2024 17:55

نواز شریف فضل الرحمان کو منانے ان کی رہائش گاہ پہنچ گئے

اسلام آباد(اردو پوائنٹ اخبارتازہ ترین۔01 مارچ2024 ء) پاکستان مسلم لیگ ن کے قائد نواز شریف جمعیت علماءاسلام (ف)کے سربراہ مولانا فضل الرحمان کو منانے ان کی رہائش گاہ پہنچ گئے،نواز شریف نے مولانا فضل الرحمان کوحکومت میں شامل ہونے کی دعوت دیدی۔دونوں رہنماﺅں کے درمیان اہم ملاقات میں ملکی سیاسی صورتحال سمیت اہم امور پر بات چیت کی گئی ۔ملاقات میں احسن اقبال،اسحاق ڈار، رانا ثنااللہ، خواجہ سعد رفیق اور مولانا غفور حیدری بھی شریک ہوئے۔

اس کے علاوہ ملاقات میں گورنر کے پی غلام علی اور نورعالم خان بھی شریک تھے۔مولانا فضل الرحمان نے نواز شریف اور ان کے ساتھیوں کا استقبال کیا۔ ان کی جانب سے گورنر خیبر پختونخوا غلام علی، رکن قومی اسمبلی عبدالغفورحیدری اور نور عالم خان بھی موجود تھے۔

(جاری ہے)

سابق وزیر اعظم میاں نوازشریف نے مولانا فضل الرحمان کو حکومت میں شمولیت پر آمادہ کرنے کے ساتھ سربراہ جے یوآئی سے ن لیگ کے نامزد وزیراعظم اور صدر مملکت کا ووٹ بھی مانگا۔

میاں نواز شریف اور مولانا فضل کے مابین ملاقات ختم ہوتے ہی قائد مسلم لیگ ن، مولانا فضل الرحمان کی رہائش گاہ سے روانہ ہوگے۔رہنما مسلم لیگ ن خواجہ سعد رفیق کا کہنا ہے کہ نواز شریف اور مولانا فضل الرحمان کی ون ٹو ون ملاقات ہوئی ہے، اللہ پاک بہتری کرے گا، انشااللہ سب ٹھیک ہوگا۔ملاقات کے بعدمیڈیا سے گفتگو کرتے ہوئے مسلم لیگ ن کے رہنما رانا ثنا اللہ نے کہا کہ دونوں رہنماو¿ں کے مابین ملاقات بہت اچھی رہی، مولانا فضل الرحمان سے ہمیشہ رہنمائی ملتی رہی ہے ہم نے پی ٹی آئی کے دورمیں بڑا سخت وقت گزارا ہے، مولانا ہمارے ساتھ بہت شفیق ہیں ان کی ہم سے کوئی ناراضی نہیں ہے۔

انہوںنے کہا کہ نواز شریف اور مولانا فضل الرحمان کی ملاقات اچھی رہی، دونوں رہنماوٴں میں ون آن ون ملاقات بھی ہوئی ہے جس میں تمام قومی معاملات زیر غور لائے گئے، مولانا فضل الرحمان نے اپنے موقف سے آگاہ کیا۔مولانا فضل الرحمان ہمارے رہنما ہیں ہم نے سخت وقت گزارا ہے ہمیں مولانا فضل الرحمان سے ہمیشہ رہنمائی ملتی رہی ہے ہماری کوشش ہے وہ ہمارے ساتھ رہیں ہم چاہتے ہیں مولانا فضل الرحمان کی رہنمائی موثر رہے۔

ان کا کہنا تھا کہ نواز شریف مولانا فضل الرحمان سے ووٹ مانگنے کی نیت سے نہیں آئے بلکہ ملک کو درپیش سیاسی صورتحال پر بات ہوئی ہے، ون آن ون ملاقات میں پاکستان کی بہتری کے لئے کسی نتیجے پر پہنچیں ہوں گے، جو احترام میاں نواز شریف کی نظر میں اور مولانا کی نظر میں نواز شریف کا ہے وہ مثالی ہے ہمیشہ ایک دونوں نے ایک دوسرے کی بات مانی ہے۔انہوں نے کہا کہ محمود خان اچکزائی ایک معتبر اور محب وطن سیاست دان ہیں ہم محمود خان اچکزائی کو بھی ساتھ جوڑیں گے۔