نئی دلی ، وزیر داخلہ کے قافلے سے تیز رفتار کار ٹکر ا گئی،بھارتی پیرا ملٹری سینٹرل ریزرو پولیس فور س کا ایک اہلکار زخمی

ہفتہ 30 مارچ 2024 13:20

نئی دہلی(اُردو پوائنٹ اخبارتازہ ترین - این این آئی۔ 30 مارچ2024ء) نئی دہلی میں ایک تیز رفتار کار وزیر داخلہ امیت شاہ کے قافلے سے ٹکرا گئی ہے، واقعہ میں بھارتی پیرا ملٹری سینٹرل ریزرو پولیس فور س کا ایک اہلکار شدید زخمی ہو ا ہے۔ کشمیرمیڈیاسروس کے مطابق یہ واقعہ گزشتہ ہفتے پیش آیا ہے ۔

(جاری ہے)

ٹائمز آف انڈیا نے اپنی ایک رپورٹ میں لکھاکہ تیز رفتار کار نے امیت شاہ کے قافلے میں موجود سیکورٹی کی ایک گاڑی کو ٹکر مار دی جسکے نتیجے میں 33سالہ سی آر پی ایف کانسٹیبل کاشی سنگھ بری طرح زخمی ہو ا۔

پولیس نے کار ڈرائیور کو فوری طور پر گرفتار کر لیا جس کی شناخت ریاست ہریانہ کے گڑ گائوں کے رہائشی 42سالہ انوراگ ڈونگ کے طور پر ہوئی ہے۔ بھارتی ذرائع ابلاغ نے لکھا کہ وزیر داخلہ کے قافلے سے تیز رفتار کار کا ٹکرا جانا ایک انتہائی غیر معمولی واقعہ ہے جس نے بڑے پیمانے پر قیاس آرائیوں کو جنم دیا ہے کہ آیا یہ محض ریش ڈرائیونگ کا معاملہ تھا یا اس کے پیچھے کوئی اور مقصد تھا۔