مودی حکومت مقبوضہ جموں وکشمیر میںآبادکاری کے نوآبادی منصوبے پر تیزی سے عمل پیرا ہے، رپورٹ

جمعہ 5 اپریل 2024 21:03

اسلام آباد (اُردو پوائنٹ اخبارتازہ ترین - این این آئی۔ 05 اپریل2024ء) نریندر مودی کی زیر قیادت ہندو توا بھارتی حکومت بھارت کے غیر قانونی زیر قبضہ جموںوکشمیر میں مسلمانوں کی اکثریت کو اقلیت میں بدلنے کیلئے آبادکاری کے نوآبادیاتی منصوبے پر تیزی سے عمل پیرا ہے۔ کشمیر میڈیا سروس کی جانب سے جاری رپورٹ میں کہا گیا ہے کہ مودی حکومت کی طرف سے مقبوضہ جموںوکشمیر کی خصوصی حیثیت کے خاتمے کا بنیادی مقصد ہی کشمیریوں کی زمینیں چھین کر ان پر بھارتی ہندوئوں کو بسانا ہے۔

رپورٹ میں کہا گیا ہے کہ مودی حکومت مقبوضہ علاقے میں سرمایہ کاری کے نام پر بھارتی سرمایہ داروں کو وہاں لارہی ہے جبکہ مقامی تاجروں کو انکی روزی روٹی سے محروم کیا جا رہا ہے۔رپورٹ میں کہا گیا ہے کہ بھارتی انتظامیہ نے اب تک لاکھوں بھارتی ہندوئوں کو مقبوضہ علاقے کے ڈومیسائل سرٹیفکیٹس جاری کیے ہیں۔

(جاری ہے)

کشمیریوں سے انکے گھر، اراضی اور دیگر املاک چھینی جا رہی ہیں اور انہیں نوکریوں سے برطرف کر کے مفلوک الحال بنایا جا رہا ہے۔

رپورٹ میں کہاگیا کہ بھارت عالمی سطح پر تسلیم شدہ متنازعہ علاقے میں عالمی قوانین اور اصول و ضوابط کی دھجیاں اڑا رہا ہے ، علاقے میں آبادی کے تناسب کو تبدیل کرنا اقوام متحدہ کی قراردادوں کی بھی صریح خلاف ورزی ہے۔ رپورٹ میں بین الاقوامی برادری پر زور دیا گیا کہ وہ مودی حکومت کو مسلم اکثریتی جموں و کشمیر میں آبادی کے تناسب کو تبدیل کرنے سے روکے۔