بھارتی پولیس نے جماعت اسلامی جموں و کشمیر کے ترجمان زاہد علی کو دوبارہ گرفتار کر لیا

جمعہ 17 مئی 2024 13:13

سرینگر (اُردو پوائنٹ اخبارتازہ ترین - اے پی پی۔ 17 مئی2024ء) بھارت کے غیر قانونی زیرتسلط جموں وکشمیر میں بھارتی پولیس نے جماعت اسلامی کے ترجمان ایڈووکیٹ زاہد علی کو دوبارہ گرفتار کر لیا ہے۔کشمیرمیڈیاسروس کے مطابق ایڈووکیٹ زاہد علی کو جموں خطے کی کٹھوعہ جیل سے تقریبا تین سال سے زائد عرصے کی طویل غیر قانونی نظر بندی کے بعد حال ہی میں ضمانت پر رہا کیا گیا تھا۔

(جاری ہے)

زاہد علی کو پولیس نے ضلع پلوامہ کے علاقے نہامہ سے ان کی رہائش گاہ سے گرفتار کرنے کے بعد نامعلوم مقام پر منتقل کر دیاہے۔زاہد علی کوجو جماعت اسلامی جموں و کشمیر کے پولیٹیکل بیورو کے سربراہ اور چیف ترجمان ہیں،قبل ازیں 22 مارچ 2019 کو حراست میں لیا گیا اور پھر 11 اپریل 2020 کو رہا کر دیا گیا تھا۔انہیں 30 جون 2020 کو دوبارہ گرفتار کیا گیا اور حال میں رہا کر دیا گیا تھا۔ انہوں نے رہائی کے بعد ذرائع ابلاغ کے نمائندوں سے گفتگو کے دوران مقبوضہ علاقے میں ہونے والے بھارتی پارلیمانی انتخابات کی مخالف کی تھی۔