بحران سے نکلنے کا واحد حل ایک دوسرے کو معاف کر دینے میں ہے، ڈاکٹر طاہر القادری

فتح مکہ کی سنت کی پیروی کی جائے، نیا سوشل کنٹریکٹ ناگزیر ہو گیا،سب قصور وار ہیں کوئی زیادہ کوئی کم،بلیم گیم سے باہر نکل کر ملک کا سوچیں

جمعہ 31 مئی 2024 23:37

بحران سے نکلنے کا واحد حل ایک دوسرے کو معاف کر دینے میں ہے، ڈاکٹر طاہر ..

اسلام آباد (اُردو پوائنٹ اخبارتازہ ترین - این این آئی۔ 31 مئی2024ء) تحریک منہاج القرآن کے بانی و سرپرست شیخ الاسلام ڈاکٹر محمد طاہرالقادری نے کہا ہے کہ بحران سے نکلنے کا واحد حل ایک دوسرے کو معاف کر دینے میں ہے،فتح مکہ کی سنت کی پیروی کی جائے، نیا سوشل کنٹریکٹ ناگزیر ہو گیا،سب قصور وار ہیں کوئی زیادہ کوئی کم،بلیم گیم سے باہر نکل کر ملک کا سوچیں۔

نجی ٹی وی کو ایک انٹرویو دیتے ہوئے کہا کہ حضور نبی اکرمؐنے فتح مکہ کے موقع پر بدترین دشمنوں کو معاف کر کے اسلام کے سنہری دور کا آغاز کیا، اگر کوئی چاہتا ہے کہ پاکستان موجودہ بحرانوں سے نکل آئے تو پھر ایک دوسرے کو معاف کریں۔ قصوروں کو ناپیں گے تو 100فیصد بے قصور کوئی نہیں نکلے گا۔ کوئی نہیں کہہ سکتا کہ سب اپنی حدوں میں رہے لہٰذا ایک دوسرے کو معاف کریں اور پاکستان کو بھی معاف کریں۔

(جاری ہے)

انہوںنے کہاکہ سیاست سے ریٹائرمنٹ لے چکا واپسی کا کوئی ارادہ نہیں، علمی و تحقیقی کام پر ساری توجہ مرکوز ہے، استحکام کے لئے انتقام کو چھوڑنا ہوگا، فارم 45 اور فارم 47کی بحث سے کچھ نہیں نکلے گا۔ اس بحث نے ذہنی حالات یہاں تک پہنچا دئیے کہ نوجوان 1947کے فیصلے پر شک کرنے لگے، آئین قانون دونوں گمشدہ ہیں انہیں بازیاب کروانے کی ضرورت ہے،ملک کی سلامتی سے انا بڑی نہیں ہوتی۔

انہوںنے کہاکہ پاکستان کو اس وقت کسی بیرونی جنگ کا خطرہ نہیں اس کے باوجود ہر طبقہ حالت جنگ میں ہے۔انہوںنے نکہاکہ لوگوں کے غم و غصہ کو ٹھنڈا کریں، ایک دوسرے کو سنا اور سمجھا جائے ایک دوسرے کو راستہ دیں، آئین کی حکمرانی اور قانون کی بالادستی میں ہی استحکام اور بقا ہے۔انہورںنے کہاکہ سب اپنی اپنی حدوں کا عدل و انصاف کے ساتھ ازسرنو تعین کریں۔

انہوں نے کہا کہ میں متعدد بار واضح کر چکا ہوں کہ 2024ء کے دھرنے سے پہلے میری جنرل ظہیر الاسلام یا کسی جنرل سے کوئی ملاقات نہیں ہوئی۔انھوں نے کہا کہ سانحہ ماڈل ٹاؤن کی ایف آئی آر جنرل راحیل شریف کے کہنے پر درج ہوئی کیونکہ شریف برادران نے عدالتی احکامات کے باوجود ایف آئی آر درج نہیں ہونے دی تھی جنرل راحیل شریف نے نوازشریف کے کہنے پر ہم سے ملاقات کی، میں کینیڈا تھا کہ اس وقت کی حکومت نے میرے لاہور والے گھر مرکز پر حملہ کروایا اور 14 کارکنوں کو شہید 100 کو شدید زخمی کر دیا ہمیں آج دس سال کے بعد بھی انصاف نہیں ملا۔