سائٹ کراچی کے صنعتکاروں کی وزیراعظم ، وزیر خزانہ، وزیر تجارت سے ایس آراو350 واپس لینے کی اپیل

مئی 2024 کی ٹیکس مدت کے لیے ریٹرن فائل کرنے کی تاریخ میں ایک ہفتے کی توسیع کی جائے، صدر سائٹ ایسوسی ایشن ایس ایس جی سی، کے الیکٹرک کے ریٹرن فائل کرنے سے قاصر ہونے کے باعث صنعتوں کی اکثریت ریٹرن فائل نہیں کر پارہی، کامران عربی

ہفتہ 29 جون 2024 20:55

کراچی(اُردو پوائنٹ اخبارتازہ ترین - این این آئی۔ 29 جون2024ء) سائٹ ایسوسی ایشن آف انڈسٹری کراچی کے صدر محمد کامران عربی نے حکومت سے ایک بار پھر ایس آر او 350 فوری واپس لینے کا مطالبہ کیا ہے جو صنعتکار برادری کے لیے شدید مشکلات کا باعث بنا ہوا ہے۔ انہوں نے ایک بیان میں کہا کہ پبلک یوٹیلیٹی کمپنی سوئی سدرن گیس کمپنی لمیٹڈ ( ایس ایس جی سی) اور کے الیکٹرک ابھی تک ایس آر او 350 کی وجہ سے مئی 2024 کی ٹیکس مدت کے لیے اپنا سیلز ٹیکس ریٹرن وقت پر فائل نہیں کر سکی ہے جس کے نتیجے میں صنعتوں کی اکثریت ریٹرن فائل نہیں کر پارہی اور انہیں غیر ضروری پریشانی کا سامنا کرنا پڑرہا ہے۔

کامران عربی نے ایف بی آر سے مئی 2024 کی ٹیکس مدت کے لیے ریٹرن فائل کرنے کی تاریخ میں مزید ایک ہفتے کی توسیع کی درخواست کرتے ہوئے کہا کہ مارچ 2024 میں ایس آر او 350 (I)/2024 کے اجراء کے بعد سے بزنس کمیونٹی کی مشلات مزید بڑھ گئی ہیںکیونکہ وہ آخری تاریخ تک ضروریات پوری نہ ہونے کی وجہ سے اپنے ماہانہ سیلز ٹیکس ریٹرن بروقت فائل کرنے سے قاصر ہیں بلکہ ان کی اپنی کوئی غلطی نہ ہونے کے باوجود انہیںاپنے اِن پٹ پر غیر ضروری ٹیکس واجبات بھی ادا کرنے پڑ رہے ہیں۔

(جاری ہے)

اس ایس آر او نے ایک بار پھر ایف بی آر کی پالیسیوں اور ان پر عمل درآمد کے ادھورے کام کی قلعی کھول دی ہے۔صدر سائٹ ایسوسی ایشن نے مزید کہا کہ یہ معاملہ بزنس کمیونٹی کی جانب سے اپریل میں کراچی میں وزیراعظم پاکستان سے ملاقات کے دوران بھی اٹھایا گیا تھاجہاں انہوں نے وزیر اعظم سے درخواست کی تھی کہ وہ ایس آر او 350 کو واپس لینے کے احکامات جاری کریں کیونکہ بزنس کمیونٹی غیر معقول سیلز ٹیکس اور سیلز ٹیکس ریٹرن کی بروقت فائلنگ کے حوالے سے غیر یقینی صورتحال اور ابہام کا شکار ہیں۔

کامران عربی نے وزیر اعظم میاں شہباز شریف، وزیر خزانہ اور وزیر تجارت سے اپیل کی کہ وہ مذکورہ صورتحال کا نوٹس لیں اور کاروباری اداروں اور صنعتوںکو آسانی سے چلانے کے لیے ایس آر او 350 کو واپس لینے کے احکامات جاری کریں جو پہلے ہی بہت مشکل وقت سے گزر رہے ہیں۔