بنوں میں دہشتگردوں کا پولیس چوکی پر حملہ، اہلکار شہید، 3 حملہ آور مارے گئے

حملے کے دوران دہشت گردوں کی جانب سے بھاری ہتھیاروں کا استعمال کیا گیا، علاقے میں سرچ آپریشن جاری

ساجد علی اتوار 3 اگست 2025 09:50

بنوں میں دہشتگردوں کا پولیس چوکی پر حملہ، اہلکار شہید، 3 حملہ آور مارے ..

بنوں ( اُردو پوائنٹ اخبارتازہ ترین۔ 03 اگست 2025ء ) صوبہ خیبرپختونخواہ کے علاقہ بنوں میں دہشت گردوں کے پولیس چوکی پر حملے میں ایک اہلکار شہید اور 3 حملہ آور مارے گئے۔ تفصیلات کے مطابق دہشت گردوں کی جانب سے بنوں میں پولیس چوکی فتح خیل پر حملہ کیا گیا جس کو بہادر پولیس اہلکاروں نے ناکام بنادیا، پولیس کی بھرپور جوابی کارروائی میں 3 دہشت گرد ہلاک ہوگئے، دہشت گردوں کے حملے میں ایک اہلکار شہید اور 3 زخمی ہوئے۔

بتایا گیا ہے کہ حملے کے دوران دہشت گردوں کی جانب سے بھاری ہتھیاروں کا استعمال کیا گیا، پولیس اہلکار نیاز نے بہادری سے لڑتے ہوئے جام شہادت نوش کیا، دہشت گردوں سے مقابلے میں اہلکار سوداد، مفتی محمود زخمی ہوئے، حملے کے بعد آر پی او اور ڈی پی او کی قیادت میں علاقے میں سرچ آپریشن جاری ہے، اس کامیاب آپریشن پر آر پی او اور ڈی پی او کی جانب سے اہلکاروں کے ہمراہ پاکستان زندہ باد کے نعرے لگائے گئے۔

(جاری ہے)

وفاقی وزیر داخلہ محسن نقوی نے فتنہ الہندوستان کے دہشتگردوں کا بہادری سے مقابلہ کرتے ہوئے شہید ہونے والے پولیس اہلکار کو خراج عقیدت پیش کیا اور لواحقین سے دلی ہمدردی و اظہار تعزیت بھی کیا، انہوں نے کہا کہ زخمی اہلکاروں کی جلد صحت یابی کے لئے دعا گو ہوں، حملہ آور 2 بھارتی سپانسرڈ دہشتگردوں کو جہنم واصل کرنے پر پولیس کو خراج تحسین پیش کرتے ہیں، شہید پولیس اہلکار روح نیاز کی قربانی کو سلام پیش کرتے ہیں۔

وزیر داخلہ نے مزید کہا کہ پولیس نے تاریکی میں حملہ کرنے والے بھارتی حمایت یافتہ دہشتگردوں کا جواں مردی سے مقابلہ کیا اور جرات سے حملہ کو ناکام بناتے ہوئے 2 دہشت گردوں کو عبرتناک انجام تک پہنچایا، دہشت گردوں سے مقابلے کے دوران پولیس اہلکار نے فرض کی راہ میں جان نچھاور کرکے شہادت کا اعلی مرتبہ پایا ہے، خیبرپختونخواہ پولیس کے بہادر سپوت کی عظیم قربانی کو ہمیشہ یاد رکھیں گے۔