پنجاب کے مختلف شہروں میں مون سون کا طوفانی سپیل، معمولات زندگی متاثر

لاہور(اُردو پوائنٹ اخبارتازہ ترین - این این آئی۔ 12 جولائی2024ء) صوبائی دارالحکومت سمیت پنجاب کے مختلف شہروں میں مون سون کے طوفانی سپیل سے معمولات زندگی بری طرح متاثر رہے ، کئی گھنٹوں تک مسلسل جاری رہنے والی بارش سے نشیبی علاقے زیر آ ب آگئے جبکہ بجلی کا ترسیلی نظام بھی بری طرح متاثر رہا ،ڈی جی پی ڈی ایم اے نے صوبے کے ڈپٹی کمشنرز اور متعلقہ محکموں کو ہنگامی صورتحال سے نمٹنے کے لیے ہدایات جاری کردیں جبکہ صوبائی کنٹرول روم سمیت تمام اضلاع کے ڈسٹرکٹ ایمرجنسی آپریشن سینٹرز کو بھی الرٹ کردیا گیا ہے۔

تفصیلات کے مطابق صوبائی دارالحکومت سمیت پنجاب کے مختلف اضلاع میں علی الصبح تیز ہوائوں کے ساتھ کہیں ہلکی اور کہیں تیز بارش ہوئی اور یہ سلسلہ کئی گھنٹوں تک جاری رہا ۔

(جاری ہے)

بارش سے نشیبی علاقے زیر آ ب آ گئے ،نشیبی علاقوں اور مختلف شاہراہوں پر پانی کھڑا ہونے سے معمولات زندگی بری طرح متاثر رہے ۔ کئی علاقوںمیں بارش کا پانی گھروںمیں داخل ہو گیا ۔

بارش کی وجہ سے سرکاری و نجی ملازمین کو دفاتر اور اپنے کاروبار پر پہنچنے میں شدید مشکلات کا سامنا رہا ۔صوبائی دارالحکومت لاہور میں شملہ پہاڑی، لکشمی چوک، گوالمنڈی، قرطبہ چوک، ڈیوس روڈ، مال روڈ، اچھرہ، قینچی، چونگی امر سدھو، گجومتہ، اسلامپورہ، بند روڈ، انار کلی، شالامار باغ، ماڈل ٹان، گلبرگ، گارڈن ٹائون سمیت دیگر مقامات پر بادل برسے۔

صوبائی دارالحکومت لاہور میں موسلا دھار بارش سے نشیبی علاقے زیر آب گئے، متعدد علاقوں میں پانی جمع ہو گیا، سڑکیں اورگلیاں تالاب کامنظرپیش کرنے لگیں۔مون سون کے رواں سیزن کے دوران پنجاب کے صوبائی دار الحکومت لاہور میں تیز بارش نے ملی میٹر میں ٹرپل سنچری مکمل کر لی اور شہر میں 315ملی میٹر بارش سے 31سالہ ریکارڈ ٹوٹ گیا۔ محکمہ موسمیات کے مطابق شہر بھر میں ساڑھے 7گھنٹے میں 315ملی میٹر بارش ریکارڈ ہوئی، شہر کے درجن سے زائد علاقوں میں ایک ملی میٹر سے زائد بارش ریکارڈ ہوئی، موسمیاتی تبدیلیوں اور مون سون کی وجہ سے شہر لاہور بارش کی زد میں ہے۔

رپورٹ کے مطابق گزشتہ برس لاہور میں 291ملی میٹر بارش ریکارڈ کی گئی تھی، گزشتہ برس لاہور میں دوسری زیادہ سے زیادہ 256ملی میٹر بارش 26جون کو ہوئی، سال 2022میں لاہور میں 238ملی میٹر بارش ریکارڈ کی گئی تھی۔اس سے قبل 2018میں لاہور میں 288ملی میٹر بارش ریکارڈ کی گئی تھی، گزشتہ 31برسوں میں لاہور میں اتنے کم وقت میں اتنی بارش نہیں ہوئی۔محکمہ موسمیات کے مطابق تاجپورہ میں سب سے زیادہ 315ملی میٹر بارش ریکارڈ کی گئی، جیل روڈ پر 69، ایئرپورٹ پر 86، گلبرگ میں 103ملی میٹر جبکہ لکشمی چوک میں 170، اپرمال میں 128، مغلپورہ میں 145ملی میٹر بارش ریکارڈ کی گئی۔

نشتر ٹائون میں 162، چوک ناخدا میں 151ملی میٹر بارش ریکارڈ کی گئی، پانی والا تالاب میں 151، فرخ آباد میں 140، گلشن راوی میں 151ملی میٹر بارش ریکارڈ ہوئی۔رپورٹ کے مطابق اقبال ٹائون میں 152، سمن آباد میں 153ملی میٹر، جوہر ٹائون میں 109، قرطبہ چوک میں 152ملی میٹر بارش ریکارڈ کی گئی۔لاہور میں ہونیوالی بارش سے بجلی کا ترسیلی نظام متاثر ہو گیا، بارش سے لیسکو کے 330سے زائد فیڈرز ٹرپ کر گئے۔

فیڈرز ٹرپ ہونے اور دیگر تکنیکی خرابیوں کے باعث متعدد علاقوں میں بجلی بند ہو گئی، بجلی کی بندش سے شہریوں کو مشکلات کا سامنا کرنا پڑا ۔گلشن راوی ،سمن آباد ،گلبرگ ،واہگہ،باٹا پور ،ڈیفنس ،الفلاح ٹائون ،پنجاب سوسائٹی ،محمد نگر ،والٹن روڈ،پرانا کاہنہ ،یوحنا آباد ،سگھیاں ،اسلام نگر ،گڑھی شاہو ،قلعہ گجر سنگھ ،لکشمی چوک ،اندرون شہر کے متعدد علاقوں میں بجلی بند رہی۔

اٹک، ٹیکسلا، چونیاں، منچن آباد، گوجرانوالہ، نارووال، گجرات، قصور سمیت پنجاب کے مختلف شہروں میں بھی بارش ہوئی، بارش کے باعث گرمی کا زور ٹوٹنے سے موسم خوشگوار ہو گیا، موسم ٹھنڈا ہونے سے شہریوں کے چہرے خوشی سے کھل اٹھے، قصور،رینالہ خورداور پاکپتن میں جل تھل ایک ہوگیا، بعض مقامات پر بجلی کا ترسیلی نظام متاثر ہونے سے لوگوں کو مشکلات کا سامنا کرنا پڑا۔

ڈی جی پی ڈی ایم نے 1122سمیت دیگر ریسکیو اداروں کو مشینری اور عملے کو الرٹ رکھنے اور نشیبی علاقوں سے پانی کی نکاسی کو جلد ازجلد ممکن بنانے کی ہدایات دی ہیں۔ شہریوں کو بارش کے دوران بجلی کے کھمبوں اور تاروں سے دور رہنے،بچوں کا خاص خیال رکھنے اور نشیبی علاقوں میں جمع پانی کے قریب نہ جانے کی ہدایت کی گئی ہے۔ کسی ایمرجنسی کی صورت میں شہری 1122پر کال کرسکتے ہیں۔

پی ڈی ایم اے نے لاہور سمیت پنجاب کے مختلف اضلاع میں بارش کے باعث الرٹ جاری کر دیا ہے ۔ ڈی جی پی ڈی ایم اے کے مطابق موسلا دھار بارشوں سے پنجاب کے ندی نالوں میں طغیانی کا خطرہ ہے۔ ترجمان پی ڈی ایم اے کے مطابق اٹک 38ملی میٹر ،بہاولپور بہاولنگر 40،گجرات 38،جہلم میں 36،لاہور 45، قصور 40،شیخوپورہ 38، سیالکوٹ میں 37،فیصل آباد 39، ملتان 40،رحیم یار خان 44،ساہیوال میں 41،ٹوبہ ٹیک سنگھ 40،اوکاڑہ 41،حافظ آباد 40 ،نارووال 38،سرگودھا میں 40،مری 25اورمنگلا میں37 ملی میٹر بارش ریکارڈ کی گئی ۔سرگودھا ،منڈی بہائوالدین ،حافظ آباد اور لیہ میں بھی وقفے وقفے سے بارش کا سلسلہ جاری رہا ۔ترجمان کے مطابق پنجاب بھر میں مون سون بارشوں کا سپیل 15جولائی تک جاری رہے گا