سکیورٹی فورسز نے 3 الگ الگ آپریشنز کے دوران 5 دہشت گردوں کو جہنم واصل کر دیا، پولیس اہلکار شہید

پیر 29 جولائی 2024 22:20

راولپنڈی (اُردو پوائنٹ اخبارتازہ ترین - اے پی پی۔ 29 جولائی2024ء) سکیورٹی فورسز نے 3 الگ الگ آپریشنز کے دوران 5 دہشت گردوں کو جہنم واصل کر دیا، دہشت گردوں کی فائرنگ سے پولیس اہلکار شہید ہو گیا۔ آئی ایس پی آر کے مطابق28-29 جولائی کو سکیورٹی فورسز نے خیبرپختونخوا میں تین الگ الگ آپریشنز میں کل پانچ دہشت گردوں کو جہنم واصل کیا ۔ضلع مہمند میں انٹیلی جنس کی بنیاد پر مشترکہ آپریشن کیا گیا اور فتنہ الخوارج کے قاری سمیت تین دہشت گردوں کو جہنم واصل کیا۔

آپریشن کے دوران دہشت گردوں کے ٹھکانے کو بھی تباہ کر دیا گیا اور اسلحہ، گولہ بارود اور دھماکہ خیز مواد کا ذخیرہ برآمد کر لیا گیا۔ شدید فائرنگ کے تبادلے کے دوران کے پی کے پولیس کانسٹیبل ابرار حسین (صوابی) شہید ہو گیا۔

(جاری ہے)

ضلع ڈیرہ اسماعیل خان میں انٹیلی جنس کی بنیاد پر کی گئی ایک اور کارروائی میں سکیورٹی فورسز نے دہشت گردوں کے ٹھکانے کو موثر طریقے سے نشانہ بنایا جس کے نتیجے میں خارجی صفت اللہ عرف ملا منصور کو جہنم واصل کر دیا گیا جبکہ تین دیگر دہشت گرد زخمی ہوگئے۔

خارجی صفت اللہ 12 دسمبر 2023 کو درابن میں خودکش بم حملے میں سہولت کاری سمیت علاقے میں دہشت گردی کی متعدد کارروائیوں میں ملوث تھا اور قانون نافذ کرنے والے اداروں کو انتہائی مطلوب تھا۔شمالی وزیرستان کے ضلع میں ہونے والی تیسری کارروائی میں ایک اور خارجی دہشت گرد کو سکیورٹی فورسز نے جہنم واصل کر دیا۔ آئی ایس پی آر کا کہنا ہے کہ پاکستان کی سکیورٹی فورسز پاکستان میں امن و استحکام کو یقینی بنانے کے لیے دیگر قانون نافذ کرنے والے اداروں کے ساتھ کندھے سے کندھا ملا کر کھڑی ہیں اور ہمارے بہادر جوانوں کی ایسی قربانیاں ہمارے عزم کو مزید مضبوط کرتی ہیں۔