Live Updates

’جنرل فیض نے 2019ء میں کہا حکومت آپ لے لیں‘ خواجہ آصف کا انکشاف

20 منٹ کی یہ ملاقات جنرل باجوہ کے سسر کے گھر پر ہوئی تھی جہاں فیض حمید نے جون تک پنجاب حکومت اور دسمبر میں وفاقی حکومت لینے کی پیشکش کی۔ وزیر دفاع کا دعویٰ

ساجد علی جمعرات 1 اگست 2024 15:47

’جنرل فیض نے 2019ء میں کہا حکومت آپ لے لیں‘ خواجہ آصف کا انکشاف

اسلام آباد ( اُردو پوائنٹ اخبارتازہ ترین۔ 01 اگست 2024ء ) وزیر دفاع خواجہ آصف نے انکشاف کیا ہے کہ 2019ء میں جنرل فیض حمید نے کہا ہم عمران خان سے بالکل تنگ آچکے ہیں، آپ جون تک پنجاب اور دسمبر میں وفاقی حکومت لے لیں۔ جیو نیوز کے پروگرام میں گفتگو کرتے ہوئے انہوں نے بتایا کہ اپریل 2019ء میں اس وقت کے لیفٹیننٹ جنرل فیض حمید سے ملاقات ہوئی تھی، ان کے ساتھ 20 منٹ کی یہ ملاقات جنرل باجوہ کے سسر کے گھر پر ہوئی تھی جہاں فیض حمید نے جون تک پنجاب حکومت اور دسمبر میں وفاقی حکومت لینے کی پیشکش کی، فیض حمید نے کہا تھا کہ ’ہم عمران خان سے تنگ آگئے ہیں، بانی پی ٹی آئی ایکسپوز ہوچکے ہیں، پاکستان تو کیا دنیا میں بھی کوئی ایک آدمی بتا دیں جو ان پر اعتبار کرتا ہو‘۔

وزیر دفاع نے کہا کہ ملاقات کے دوران فیض حمید نے پوچھا کہ ’آپ جنرل باجوہ کو توسیع دے رہے ہیں یا نہیں؟‘ اس کا دیتے ہوئے میں نے کہا تھا کہ ’ ہاں بالکل ہم جنرل باجوہ کو توسیع دے رہے ہیں اور ہم نے بعد میں دی بھی‘، اس وقت فیض حمید نے دریافت کیا کہ ’ آپ کی شرائط کیا ہیں؟‘ اس پر میں نے کہا تھا کہ ’یہ ہدایات ہیں، ہماری کوئی شرائط نہیں ہے‘۔

(جاری ہے)

ان کا کہنا ہے کہ ’بانی پی ٹی آئی کو اپنی ذات اور اقتدار کے سوا کوئی چیز یا رشتہ عزیز نہیں، ان کی حکمت عملی یہ ہے کہ بڑھک مارو، اگلا ڈر جائے تو ٹھیک ورنہ مذاکرات کی بات کرو، بانی پی ٹی آئی سے متعلق بیان پر قائم ہوں کہ انہوں نے پاؤں پکڑنے ہی پکڑنے ہیں، علیمہ خان نے بھی اپنی پریس کانفرنس میں ترلے کی ٹون میں بات چیت کی لیکن انہوں نے دہشت گردوں کو واپس لا کر آباد کیا، یہ ملک دیوالیہ کرکے گئے، آئی ایم ایف کو خط انہوں نے لکھے، اس صورتحال میں اب پی ٹی آئی کی خام خیالی ہے کہ یہ لوگ ستمبر یا نومبر کے بعد حکومت میں آجائیں گے، یہ لوگ صبح پراٹھوں کا ناشتہ کرکے آتے ہیں پھر بھوک ہڑتال پر بیٹھ جاتے ہیں‘۔