برطانیہ میں سوشل میڈیا پر جھوٹ سے ہنگاموں کے ساتھ ہی عدالتیں 24 گھنٹے کھل گئیں‘عرفان صدیقی

ہفتہ 10 اگست 2024 18:34

اسلام آباد(اُردو پوائنٹ اخبارتازہ ترین - آن لائن۔ 10 اگست2024ء) سینیٹ میں پاکستان مسلم لیگ (ن) کے پارلیمانی پارٹی لیڈر اور خارجہ امور کمیٹی کے سربراہ سینیٹر عرفان صدیقی نے کہا ہے کہ برطانیہ میں تین بچیوں کے قتل اور سوشل میڈیا پر جھوٹ سے ہنگاموں کے ساتھ ہی عدالتیں 24گھنٹے کھل گئیںاور ادھر سوا سال ہو چلا 9 مئی، تیزاب زدہ چہرہ لئے،انصاف کے لئے بھٹک رہا ہے اور بلوائی للکار رہے ہیں’’ہم سے معافی مانگو‘‘۔

ایک بیان میں سینیٹرعرفان صدیقی نے کہا کہ برطانیہ میں 29 جولائی کو تین بچیوں کے قتل اور سوشل میڈیا کے جھوٹ سے پھوٹنے والے ہنگاموں کے ساتھ ہی عدالتیں چوبیس گھنٹے کھلی رکھنے کا حکم جاری ہوگیا۔انہوں نے کہا کہ تیسرے دن مقدمات کی فوری سماعت اور سزاؤں کے عمل کا آغاز ہو گیا۔

(جاری ہے)

دو ہفتوں میں ایک سو سے زائد بلوائی جیل جاچکے۔ ہنگامے سے ہٹ کر تماشا دیکھنے والے دو افراد کی ضمانتی درخواستیں مسترد کرتے ہوئے بلفاسٹ ڈسٹرکٹ کورٹ کے جج،فرانسس رافرٹے نے کہا ''ہنگامے میں حصہ لینے والے بلوائی ہوں یا تجسس کی وجہ سے قریب کھڑے تماشائی، کسی کو بھی ضمانت نہیں ملے گی‘‘۔

عرفان صدیقی نے کہا کہ اور ادھر سوا سال ہو چلا 9 مئی، تیزاب زدہ چہرہ لئے،انصاف کے لئے بھٹک رہا ہے اور بلوائی للکار رہے ہیں’’ہم سے معافی مانگو‘‘۔