یوم آزادی پر اولمپک چیمپئن ارشد ندیم کی تصویر والا خصوصی ڈاک ٹکٹ جاری

ارشد ندیم نے پیرس اولمپکس میں 92.97 میٹر فاصلے پر نیزہ پھینک کر نیا اولمپک ریکارڈ قائم کرکے گولڈ میڈل حاصل کیا اور نوجوان نسل کیلئے مثال بن گئے

ذیشان مہتاب ہفتہ 10 اگست 2024 17:49

یوم آزادی پر اولمپک چیمپئن ارشد ندیم کی تصویر والا خصوصی ڈاک ٹکٹ جاری

اسلام آباد (اردو پوائنٹ تازہ ترین اخبار۔ 10 اگست 2024ء ) وزیراعظم شہباز شریف کی خصوصی ہدایت پر ملک کے 77 ویں یوم آزادی کے موقع پر ”عزم استحکام“ کے عنوان سے خصوصی ڈاک ٹکٹ جاری کر دیا گیا، ڈاک ٹکٹ پر پاکستان کے جیولین تھرور سٹار ارشد ندیم کی تصویر لگا کر انہیں خراج تحسین پیش کیا گیا ہے۔ 27 سالہ ارشد ندیم نے پیرس اولمپکس میں 92.97 میٹر فاصلے پر نیزہ پھینک کر نیا اولمپک ریکارڈ قائم کرکے گولڈ میڈل حاصل کیا اور نوجوان نسل کے لئے ایک مثال بن گئے ہیں۔

ڈاک ٹکٹ کو عزم استحکام کا عنوان دیا گیا ہے جو ملک کی ترقی اور استحکام کے عزم کا منہ بولتا ثبوت ہے۔ ڈاک ٹکٹ میں مینار پاکستان کی تصویر کو شامل کر کے پاکستان کی آزادی کی جدوجہد اور اس کی علامتی اہمیت کو بھی اجاگر کیا گیا ہے۔

(جاری ہے)

حکومت پاکستان کی جانب سے یوم آزادی کے موقع پر جاری کردہ ڈاک ٹکٹ آنے والی نسلوں کو پاکستان کی آزادی کی جدوجہد، قربانیوں اور حکومت پاکستان کی ملکی استحکام کے لئے جدوجہد اور عزم سے آگاہ کرے گا۔

واضح رہے کہ اولمپکس گیمز میں پاکستان نے آخری مرتبہ میڈل 8 اگست 1992ء میں کانسی کے تمغے کے ساتھ ہاکی ایونٹ میں حاصل کیا تھا جبکہ آخری گولڈ میڈل بھی ہاکی کی ہی بدولت 1984ء میں حاصل ہوا تھا۔