آئندہ 24 گھنٹوں میں پنجاب کے بیشتر اضلاع میں آندھی و گرج چمک کے ساتھ بارش کا امکان

جمعرات 15 اگست 2024 12:21

لاہور (اُردو پوائنٹ اخبارتازہ ترین - اے پی پی۔ 15 اگست2024ء) پی ڈی ایم اے نے18 اگست تک صوبے بھر میں مزید مون سون بارشوں کی پیش گوئی کی ہے۔ترجمان پی ڈی ایم اے کے مطابق گزشتہ 24 گھنٹوں میں جہلم 30 ملی میٹر، منگلا 25 جبکہ سیالکوٹ اور گجرانوالہ میں 19 ملی میٹر بارش ریکارڈ کی گئی۔ آئندہ 24 گھنٹوں میں پنجاب کے بیشتر اضلاع میں آندھی اور گرج چمک کے ساتھ بارش کے امکانات ہیں،اس سلسلے میں لاہور ، گجرانوالہ، راولپنڈی ،سرگودھا، ملتان، ڈیرہ غازی خان، بہاولپور ، فیصل آباد، ساہیوال اور گجرات ڈویژنز میں مون سون بارشیں متوقع ہیں۔

ڈی جی پی ڈی ایم اے عرفان علی کاٹھیا کا اس حوالے سے کہنا تھا کہ موسمی صورتحال کے بارے صوبے بھر کی انتظامیہ کو الرٹ جاری کر دیا ہے،وزیر اعلی پنجاب مریم نواز شریف کی ہدایات کے پیش نظر محکمے الرٹ رہیں،اربن فلڈنگ کے خدشے کے پیش نظر پیشگی انتظامات مکمل کریں۔

(جاری ہے)

انہوں نے کہا کمشنرز، ڈی سیز ،واسا، محکمہ آبپاشی، ریسکیو، سول ڈیفنس اور دیگر متعلقہ محکموں کو الرٹ رہنے کی ہدایات جاری کر دی ہیں۔

انہوں نے کہا کہ پی ڈی ایم اے کنٹرول روم میں 24 گھنٹے صورتحال کی مانیٹرنگ ہو رہی ہے،عوام الناس سے التماس ہے کہ حکومتی ہدایات پر عملدرآمد یقینی بنائیں،پرانی عمارتوں کھمبوں اور آسمانی بجلی کی گرج چمک سے بچا کیلئے محفوظ مقامات پر رہیں،خراب موسم کی صورتحال میں غیر ضروری سفر سے گریز کریں، ہنگامی صورتحال میں پی ڈی ایم اے کی ہیلپ لائن 1129 پر کال کریں۔