25 اگست سے ملک کے جنوبی علاقوں میں طوفانی بارشوں کی پیشگوئی

جمعہ 23 اگست 2024 20:52

اسلام آباد(اُردو پوائنٹ اخبارتازہ ترین - این این آئی۔ 23 اگست2024ء) محکمہ موسمیات نے ملک کے جنوبی علاقوں میں طوفانی بارشوں کی پیشگوئی کی ہے۔محکمہ موسمیات کے مطابق ہوا کا کم دباؤ مغربی بنگال پر موجود ہے جس کے سبب 25 اگست کی رات سے طاقتور مون سون ہوائیں ملک کے جنوبی حصے میں داخل ہوں گی۔

(جاری ہے)

محکمہ موسمیات نے بتایاکہ 25 سے 29 اگست کے دوران کراچی، حیدرآباد، ٹھٹھہ، بدین اور تھرپارکر میں تیز ہواؤں کے جھکڑ چلنے اور گرج چمک کے ساتھ بارش کا امکان ہے جب کہ 26 سے 30 اگست کے دوران خضدار، قلات، لسبیلہ، نصیر آباد اور 25 اگست کی رات سے 28 اگست کے دوران اسلام آباد، راولپنڈی، مری اور گلیات میں بھی وقفے وقفے سے بارش کا امکان ہے۔

محکمہ موسمیات کے مطابق 26 سے 28 اگست کے دوران خیبرپختونخوا اور گلگت بلتستان میں بھی گرج چمک کے ساتھ بارش متوقع ہے۔محکمہ موسمیات نے بتایا کہ بارشوں سے سندھ، بلوچستان، جنوبی پنجاب، اسلام آباد، راولپنڈی، گوجرانوالہ اور لاہور کے نشیبی علاقے زیر آب آنے، ملک کے بالائی پہاڑی علاقوں میں لینڈ سلائیڈنگ اور شدید بارشوں، آندھی کے باعث کمزور انفرااسٹرکچر کو نقصان کا بھی خدشہ ہے۔محکمہ موسمیات نے مسافروں اور سیاحوں کو محتاط رہنے کی بھی ہدایت کی ہے۔