پی ٹی آئی کپتان نہیں تو پاکستان نہیں کے ایجنڈے پر قائم ہے ، شرجیل میمن

ایک صوبے کا وزیراعلیٰ مسلح جتھہ لے کر وفاق پر حملے کی کوشش کررہا ہے، ان کے پاس ہتھیار، غیر ملکی افغانی بھی ہیں، صوبائی وزیر

ہفتہ 5 اکتوبر 2024 23:11

پی ٹی آئی کپتان نہیں تو پاکستان نہیں کے ایجنڈے پر قائم ہے ، شرجیل میمن

اسلام آباد (اُردو پوائنٹ اخبارتازہ ترین - این این آئی۔ 05 اکتوبر2024ء) وزیر اطلاعات سندھ شرجیل میمن نے کہا ہے کہ تحریک انصاف ’’ کپتان نہیں تو پاکستان نہیں ‘‘ کے ایجنڈے پر قائم ہیں،ایک صوبے کا وزیراعلیٰ مسلح جتھہ لے کر وفاق پر حملے کی کوشش کررہا ہے، ان کے پاس ہتھیار، غیر ملکی افغانی بھی ہیں۔میڈیا سے گفتگو کرتے ہوئے شرجیل میمن نے کہا کہ یہ ماضی کی طرح ملکی حالات خراب کرنے کی کوشش کررہے ہیں،ایک شخص ہے جو پورے پاکستان کو پریشان کرنا چاہتا ہے اور پاکستان کی معیشت کو تباہ کرنا چاہتا ہے۔

انہوں نے کہا کہ ماضی میں اس شخص کو پاکستان پر مسلط کیا گیا، جو ملکی سلامتی کو سبوتاژکرنا چاہتا ہے، ایک صوبے کا وزیراعلیٰ مسلح جتھہ لے کر وفاق پر حملے کی کوشش کررہا ہے، ان کے پاس ہتھیار، غیر ملکی افغانی بھی ہیں۔

(جاری ہے)

شرجیل میمن نے کہا کہ پاکستان میں شنگھائی تعاون تنظیم کا اہم اجلاس ہونے جارہا ہے، ملائیشین وزیراعظم اور وفد نے پاکستان کا دورہ کیا، یو اے ای کے سفیر اور قونصل جنرل نے سندھ آرکائیو ڈیپارٹمنٹ، موہٹا پیلس اور آرٹس کونسل کا دورہ کیا، فلسطینیوں سیاظہار یکجہتی کیلئیایس سی او کانفرنس بلائی جارہی ہے، ہمیں اس وقت فلسطینیوں کے ساتھ کھڑے ہونے کی ضرورت ہے۔

وزیر اطلاعات سندھ نے کہا کہ اسلام آباد میں پہلے کچھ مسلح لوگ پہنچا دیئے گئے تھے جو اب باہر نکل رہے ہیں، اسلام آباد میں آنے والے لوگ خیبرپختونخوا کے وسائل سمیت آرہے ہیں۔انہوںنے کہاکہ ان کے مشیر نے کہا کہ جے شنکر ان کے احتجاج میں آکر خطاب کرے، کل کو یہ کہیں گے کہ نیتن یاہو بھی پاکستان آکر خطاب کرے، زیک گولڈ سمتھ کی مہم بانی پی ٹی آئی نے چلائی تھی، زیک گولڈ سمتھ نے ایک ٹویٹ میں کہا کہ دنیا میں امید کی واحد کرن اسرائیل ہے اور اسرائیل اپنے دفاع کی جنگ لڑ رہا ہے۔

شرجیل میمن نے کہاکہ زیک گولڈ سمتھ کی مہم چلانا، اس کے بیان کی مذمت نہ کرنا اور جے شنکر کو دعوت دینا سب ایک کڑی ہے، پی ٹی آئی کے اسمبلی ممبرز ان کے حق میں بول رہے ہیں۔وزیر اطلاعات سندھ نے کہا کہ پاکستان ایک گلدستہ ہے جس میں بانی پی ٹی آئی نفرت کی آگ بھر رہا ہے، پاکستان ایٹمی ملک، کمزور کرنے کی کوشش کی جارہی ہے، پاکستان کے دشمن براہ راست حملہ نہیں کرسکتے،یہ میں نہیں کہہ رہا، ڈاکٹر اسرار احمد اور حکیم سعید نے کہا تھا، لیکن یہ جان لیں پاکستان کا دفاع مضبوط ہاتھوں میں ہے۔

انہوں نے کہا کہ خیبرپختونخوا کے عوام کو غلط طریقے سے استعمال کیا جا رہا ہے، ان کے مظاہروں میں افغانستان سے لائے گئے لوگ زیادہ ہوتے ہیں، بانی پی ٹی آئی نے اگر یہ تحریک چلانی ہے تو اپنے بچوں کو پاکستان بلوا کر اس تحریک میں شامل کریں۔