غزہ اور لبنان میں تازہ اسرائیلی حملے، درجنوں افراد ہلاک

اسلام آباد (اُردو پوائنٹ ۔ DW اردو۔ 29 اکتوبر 2024ء) لبنان کی وزارت صحت نے بتایا کہ پیر کے روز مشرقی وادی بیکا کے بالبیک کے کئی علاقوں پر اسرائیلی حملوں میں کم از کم 60 افراد ہلاک ہو گئے، جہاں ایران کی حمایت یافتہ حزب اللہ کا قبضہ ہے۔ ہلاک شدگان کی تعداد کی تصدیق منگل کی صبح کی گئی جن میں دو بچے بھی شامل ہیں۔مزید اٹھاون افراد کے زخمی ہونے کی بھی اطلاع ہے۔

اسرائیل کے لبنان اور غزہ میں حملے جاری، جنگ بندی کی کوششیں بھی جاری

غزہ میں مکمل جنگ بندی کی اُمید میں مصر کی تجویز

شمالی غزہ پر اسرائیلی حملوں میں تیزی، درجنوں فلسطینی ہلاک

واضح رہے کہ جن علاقوں پر اسرائیل نے بمباری کی، انہیں لبنانی شیعہ عسکری تنظیم حزب اللہ کا گڑھ سمجھا جاتا ہے۔

(جاری ہے)

غزہ میں بھی خونریز حملہ

ادھر غزہ کی سول ڈیفنس ایجنسی نے بتایا کہ پیر اور منگل کی رات گئے بیت لحیہ کے علاقے میں ایک رہائشی عمارت کو نشانہ بنایا گیا، جس کے منہدم ہونے سے پچپن افراد ہلاک ہو گئے۔ درجنوں افراد کے زخمی ہونے کی بھی اطلاع ہے۔ اس حملے میں ہلاک ہونے والوں میں سے پندرہ کی لاشیں کمال عدوان ہسپتال میں لائی گئیں۔

چھ اکتوبر سے اسرائیلی فوج شمالی غزہ میں جبالیہ اور بیت لحیہ کے مقامات پر آپریشن جاری رکھے ہوئے ہے۔

حوثی باغیوں کا عسقلان پر ڈرون حملہ

یمن کے حوثی باغیوں نے اسرائیلی شہر عسقلان کے صنعتی زون پر ڈرون حملہ کرنے کا دعوی کیا ہے۔ فوری طور پر اس بارے میں اسرائیلی موقف سامنے نہیں آ یا ہے۔

UNRWA پر پابندی اور عالمی رد عمل

اسرائیل کے لیے جرمن سفیر اشٹیفان زائبرٹ نے اقوام متحدہ کی ایجنسی UNRWA پر پابندی عائد کرنے سے متعلق اسرائیلی پارلیمان میں ہونے والی پیش رفت پر گہری تشویش ظاہر کی ہے۔

اقوام متحدہ کے سیکرٹری جنرل انٹونیو گوٹیرش نے کہا ہے کہ اسرائیلی اقدام کے بے حد تباہ کن نتائج برآمد ہوں گے۔ غزہ میں انسانی صورتحال انتہائی ابتر ہے۔ امریکا اور اقوام متحدہ کی سلامتی کونسل کے احتجاج کے باوجود اسرائیلی پارلیمان نے یہ قانون منظور کیا۔

غزہ اور لبنان میں جنگوں کا پس منظر

اسرائیلی افواج نے ایرانی حمایت یافتہ لبنانی تنظیم حزب اللہ کے خلاف گزشتہ ماہ باقاعدہ زمینی اور فضائی کارروائی شروع کی تھی۔ تئیس ستمبر سے شروع ہونے والی اس وسیع تر کارروائی میں اب تک لبنان میں سولہ سو سے زائد افراد ہلاک ہو چکے ہیں، جبکہ ہلاک شدگان کی حقیقی تعداد اس سے زیادہ ہو سکتی ہے۔

غزہ میں فلسطینی گروپ حماس اور اسرائیلی فورسز کے خلاف جنگ گزشتہ برس اکتوبر میں حماس کے حملے کے بعد شروع ہوئی۔ حماس کے جنگجوؤں کے اس حملے میں تقریباً بارہ سو افراد ہلاک ہوئے، جن میں اکثریت اسرائیلی عام شہریوں کی تھی۔ جنگجو ڈھائی سو کے قریب افراد کو یرغمال بنا کر بھی لے گئے تھے، جن میں سے درجنوں اب بھی حماس کی قید میں ہیں۔

اس حملے کے رد عمل میں شروع ہونے والی وسیع تر اسرائیلی فوجی کارروائیوں میں اب تک غزہ میں 43,020 فلسطینی مارے جا چکے ہیں اور زخمی ہونے والوں کی تعداد 101,110 ہے۔

ع س / ک م (نیوز ایجنسیاں)