پنجاب سمیت ملک بھر میں سموگ، لاہور آج پھر آلودہ ترین شہروں میں سرفہرست

سید مراتب علی روڈپر ایئر کوالٹی انڈیکس 1404، امریکن قونصلیٹ کے علاقے کا ایئر کوالٹی انڈیکس 826

جمعہ 15 نومبر 2024 11:56

لاہور،اسلام آباد، پشاور، ملتان(اُردو پوائنٹ اخبارتازہ ترین - این این آئی۔ 15 نومبر2024ء) پنجاب سمیت ملک کے مختلف شہروں میں سموگ کا راج برقرار ہے جبکہ لاہور آج پھر دنیا کے آلودہ ترین شہروں میں سرفہرست ہے۔باغوں کے شہر کا اے کیو آئی 780 ریکارڈ کیا گیا، لاہور میں سید مراتب علی روڈ کے علاقے کا ایئر کوالٹی انڈیکس 1404، امریکن کونصلیٹ کے علاقے کا ایئر کوالٹی انڈیکس 826 جبکہ ڈی ایچ اے کے علاقے کا اے کیو آئی 916 ریکارڈ کیا گیا۔

سموگ سے نمٹنے کیلئے لاہور کے مختلف علاقوں میں موبائل ایئر کوالٹی مانیٹرنگ سٹیشن انسٹال کر دیئے گئے، گرین لاک ڈاؤن والے علاقوں میں سموگ کو مانیٹر کیا جارہا ہے۔فضائی آلودگی کے اعتبار سے 799 اے کیو آئی کے ساتھ ملک بھر کے شہروں میں ملتان کا پہلا نمبر ہے جبکہ راولپنڈی، اسلام آباد اور پشاور میں بھی فضا زہر آلود ہے۔

(جاری ہے)

ادھر سموگ سے پریشان شہریوں کیلئے محکمہ موسمیات نے بارش کی نوید سنا دی، محکمہ موسمیات کے مطابق لاہور، اسلام آباد، راولپنڈی اور پشاور میں بارش کا امکان ہے، بھکر ، لیہ اور ڈی جی خان میں بھی گرج چمک کے ساتھ بادل برسنے کی توقع ہے جس سے سموگ میں کمی متوقع ہے۔

دوسری جانب شدید دھند کے باعث موٹرویز کو مختلف مقامات سے بند کردیا گیا جس کے باعث مسافروں کو مشکلا ت کا سامنا کرنا پڑرہا ہے۔ ترجمان موٹرویز پولیس کا کہنا ہے کہ موٹرویز کو عوام کی حفاظت کیلئے بند کیا گیا ہے، دوران سفر ٹرانسپورٹرز فوگ لائٹس کا استعمال کریں، رات کی بجائے دن کے اوقات میں سفر کریں۔