چیمپئنز ٹرافی کافائنل کہاں ہو گا بھارت نے نئے فارمولے پر بھی اعتراض عائد کردیا

پیر 2 دسمبر 2024 22:34

لاہور (اُردو پوائنٹ اخبارتازہ ترین - آن لائن۔ 02 دسمبر2024ء) چیمپئنز ٹرافی کا فائنل کہاں ہوگا بھارت نے نئے ’’پارٹنر شپ یا فیوڑن فارمولے‘‘ پر بھی اعتراض جڑ دیا،کوالیفائی کرنے کی صورت میں چیمپئنز ٹرافی کے فیصلہ کن معرکے کیلئے بھی پاکستان جانے سے انکار سامنے آگیا،پی سی بی نے بھی دو ٹوک جواب دیتے ہوئے کہا کہ اگر ایسا ہے تو ہماری ٹیم سے بھی کسی فائنل کیلئے دورے کی امید نہ رکھی جائے، تین سال کے تمام فائنلز بھی دبئی میں ہونے چاہیئں،اس کا تاحال کوئی جواب نہیں آیا۔

معاملے میں نیا ڈیڈ لاک سامنے آ گیا، بی سی سی آئی تاخیری حربے استعمال کر رہا ہے۔ دوسری جانب براڈ کاسٹرز کی کانفرنس جمعرات کو دبئی میں ہو گی، اس میں آئی سی سی کو چیمپئنز ٹرافی کا شیڈول بھی شیئرکرنا پڑے گا، ہر گزرتے دن کے ساتھ حکام کی بے چینی بڑھتی جا رہی ہے۔

(جاری ہے)

طویل عرصے بعد پاکستان کو آئندہ سال کے اوائل میں کسی آئی سی سی ایونٹ کی میزبانی کرنا ہے، چیمپئنز ٹرافی کی تیاریاں درست سمت میں گامزن تھیں کہ اچانک بھارت نے دورہ نہ کرنے کا اعلان کر کے معاملات پیچیدہ بنا دیئے۔

گذشتہ دنوں دبئی میں پی سی بی حکام کی آئی سی سی کے ٹاپ آفیشلز سے ملاقات ہوئی، چیئرمین محسن نقوی نے ویڈیو کال پر جے شاہ سے بھی بات کی ، پاکستانی بورڈ نے برابری کی سطح پر بات کرتے ہوئے ’’پارٹنر شپ یا فیوڑن فارمولہ‘‘ سامنے رکھا جس کے تحت آئندہ 3 برس میں دونوں ممالک جتنے بھی آئی سی سی ایونٹس کی میزبانی کریں ان کی ٹیمیں اپنے میچز تیسرے ملک دبئی میں کھیلیں گی۔

ماضی میں ’’بگ تھری‘‘ کے حوالے سے حمایت لینے کیلئے بی سی سی آئی نے پی سی بی کو سہانے خواب دکھائے تھے، اس وقت کے بورڈ چیف نجم سیٹھی جب وطن واپس آئے تو انھوں نے کئی ’’خوشخبریوں‘‘ کا دعویٰ کیا لیکن لیٹر پیڈ پر لکھی باتوں کو بعد میں بی سی سی آئی نے ماننے سے انکار کر دیا اور کوئی باہمی سیریز نہ ہو سکی۔ اس لیے پاکستان اب محتاط ہے اور آئی سی سی کو ساتھ رکھ کر کوئی معاہدہ چاہتا ہے،ابتدا میں بی سی سی آئی نے دلچسپی دکھائی لیکن اب معاملہ تاخیر کا شکار ہے۔