ایشیا کپ میں پاکستان کیساتھ میچ، اماراتی بورڈ نے بھارتی بائیکاٹ کے خدشات رد کر دیئے

فائنل میں رسائی کی صورت میں روایتی حریفوں کا تیسرا معرکہ بھی ہو سکتا ہے

ذیشان مہتاب جمعرات 28 اگست 2025 15:31

ایشیا کپ میں پاکستان کیساتھ میچ، اماراتی بورڈ نے بھارتی بائیکاٹ کے ..

دبئی (اردو پوائنٹ تازہ ترین اخبار ۔ 28 اگست 2025ء ) امارات کرکٹ بورڈ نے بھارت کی جانب سے پاکستان سے میچ کے بائیکاٹ کے خدشات رد کردیئے ہیں۔

تفصیلات کے مطابق بھارت کی میزبانی میں ایشیا کپ نو سے 28 ستمبر تک متحدہ عرب امارات میں کھیلا جائے گا۔

اس سے قبل پاکستانی ٹیم افغانستان اور یو اے ای کے ساتھ ٹرائنگولر سیریز میں حصہ لے گی۔

ایشیا کپ کے لیے امارات کرکٹ بورڈ نے بھرپور تیاریاں جاری رکھی ہوئی ہیں، پاکستان اور بھارت کا پہلا مقابلہ 14 ستمبر اور ممکنہ طور پر دوسرا 21 ستمبر کو ہوگا۔

(جاری ہے)

فائنل میں رسائی کی صورت میں روایتی حریفوں کا تیسرا معرکہ بھی ہو سکتا ہے۔

ایشیا کپ کے حوالے سے امارات کرکٹ بورڈ کے چیف آپریٹنگ آفیسر سبحان احمد نے کہا کہ ہماری تیاریاں مکمل ہیں، ہم شائقین کو بہترین کرکٹ سے لطف اندوز ہونے کا موقع فراہم کریں گے۔

خصوصی گفتگو کرتے ہوئے انہوں نے کہا کہ ایونٹ میں شریک تمام ٹیموں کے کرکٹ بورڈزنے اپنی حکومتوں سے اجازت لے کر ہی ایشیا کپ میں شرکت کی تصدیق کی تھی۔

سبحان احمد نے کہا کہ 100 فیصد گارنٹی تو نہیں دی جا سکتی البتہ ہمیں پوری امید ہے کہ بھارتی ٹیم پاکستان کیخلاف میچ میں بھی حصہ لے گی۔