عوامی نیشنل پارٹی کے مرکزی صدر ایمل ولی خان کا سابق صوبائی وزیر بشیر احمد بلور شہید کی 12ویں برسی پر پیغام

اتوار 22 دسمبر 2024 15:30

پشاور (اُردو پوائنٹ اخبارتازہ ترین - اے پی پی۔ 22 دسمبر2024ء) عوامی نیشنل پارٹی(اے این پی) کے مرکزی صدر ایمل ولی خان نے کہا ہے کہ امن کے علمبردار شہید بشیر احمد بلور کو 12ویں برسی پر خراج عقیدت پیش کرتے ہیں، شہید بشیر احمد بلور پوری پختون قوم کے لیے بہادری اور خدمت کی علامت تھے۔ سابق صوبائی وزیر بشیر احمد بلور شہید کی 12ویں برسی کے موقع پر اپنے پیغام میں ایمل ولی خان نے کہا کہ دہشتگردی کے خلاف بشیر احمد بلور شہید کی جراتمندانہ جدوجہد ہمارے لیے مشعل راہ ہے۔

(جاری ہے)

انہوں نے عملی طور پر ثابت کیا کہ باچا خان کے پیروکار کبھی دہشت کے سامنے تسلیم نہیں ہوسکتے۔ پختون سرزمین پر قیام امن کیلئے انکی قربانیوں کو تاریخ میں ہمیشہ یاد رکھا جائے گا۔ پختونخوا کے عوام موجودہ حالات میں شہید بشیر بلور کی کمی شدت سے محسوس کرتے ہیں۔ ایمل ولی خان نے کہا کہ ہمیں اپنے شہداء کی قربانیوں کو یاد رکھتے ہوئے امن کے خواب کو حقیقت میں بدلنا ہوگا،آج ایک دفعہ پھر صوبے کے عوام عدم تحفظ کا شکار اور دہشتگردوں کے نرغے میں ہیں۔ انہوں نے کہا کہ عوامی نیشنل پارٹی قومی تحریک کے شہداء کی قربانیوں کو کبھی فراموش نہیں کرے گی، شہید امن بشیر بلور کی برسی کے موقع پر عزم کرتے ہیں کہ دہشتگردی کے خلاف ہماری جدوجہد جاری رہے گی۔