شدید دھند کے باعث ملکی و غیرملکی فلائٹ آپریشن شدید متاثر

لاہور ایئرپورٹ پر 45سے زائد پروازیں متاثر ہوئیں،مسافروں کو مشکلات

جمعہ 10 جنوری 2025 17:50

لاہور (اُردو پوائنٹ اخبارتازہ ترین - این این آئی۔ 10 جنوری2025ء) ملک بھر میں شدید دھند اور موسمی خرابی کے سبب فلائٹ آپریشن متاثر ہو گیا جس کے باعث متعدد پروازوں میں تاخیر اور تبدیلیاں کی گئیں۔ایوی ایشن ذرائع کے مطابق لاہور ایئرپورٹ پر حد نگاہ کم ہونے کی وجہ سے کئی پروازوں کا رخ اسلام آباد کی جانب موڑ دیا گیا جبکہ بعض پروازوں میں کئی گھنٹوں کی تاخیر ہوئی۔

جدہ سے لاہور آنے والی پرواز ایس وی 738کو اسلام آباد میں لینڈ کرایا گیا۔ ابوظہبی لاہور کی پرواز ای وائے 284اور دوحہ لاہور کی پرواز کیو آر 620کو بھی اسلام آباد اتارا گیا۔ دمام سے ملتان آنے والی قومی ایئر لائن کی پرواز پی کے 150کو لاہور منتقل کر دیا گیا۔ استنبول سے لاہور کی پرواز کیو آر 714تقریباً 3گھنٹے کی تاخیر کے بعد پہنچی۔

(جاری ہے)

مسقط سے لاہور کی پرواز او وی 521ایک گھنٹے تک فضا میں چکر لگانے کے بعد 3:45پر لینڈ ہوئی۔

شارجہ لاہور کی پرواز ایف زی 503اور دبئی و جدہ سے آنے والی پروازوں کو بھی تاخیر کا سامنا رہا۔ دبئی اور جدہ سے لاہور آمد کی پروازوں میں بھی تاخیر ہوئی۔ لاہور، دبئی، جدہ، ابوظہبی استنبول، دوحہ، کراچی روانگی کی پروازوں میں تاخیر ہوئی۔ لاہور سے دمام، دبئی، کویت سٹی کی پروازیں بھی تاخیر سے روانہ ہوئیں ۔ سیالکوٹ، فیصل آباد اور ملتان ایئرپورٹ پر بھی شدید دھند سے لینڈنگ متاثر ہوئی ۔

اس کے علاوہ اسلام آباد سے کراچی کی دو پروازیں پی اے 200اور پی اے 201منسوخ کر دی گئیں۔ لاہور سے ابوظہبی کی پرواز ای وائے 285اور لاہور جدہ کی پرواز ایس وی 739بھی تاخیر کا شکار رہیں۔لاہور ایئرپورٹ پر 45سے زائد پروازیں متاثر ہوئیں جن میں 20گھنٹے تک کی تاخیر بھی شامل تھی۔ سیالکوٹ، فیصل آباد، اور ملتان کے ایئرپورٹس پر بھی شدید دھند کے باعث فلائٹ آپریشن معطل رہا ۔

حکام نے موسم میں بہتری آنے پر اسلام آباد میں اتاری گئی پروازوں کو لاہور منتقل کر دیا ۔ تاہم کراچی اور پشاور ایئرپورٹس پر جزوی آپریشن جاری رہا۔ صورتحال کے باعث مسافروں کو مشکلات کا سامنا کرنا پڑا ۔ مسافروں کو مشورہ دیا گیا ہے کہ وہ اپنی پروازوں کے بارے میں تازہ ترین معلومات کے لیے متعلقہ ایئرلائنز سے رابطہ کریں۔