سونے کی قیمت میں مسلسل چوتھے روز بھی اضافہ، نئی قیمت 2 لاکھ 79 ہزار سے اوپر چلی گئی

10 گرام سونے کی قیمت بھی 3499 روپے بڑھ گئی ہے، نئی قیمت 2 لاکھ 39 ہزار 540 روپے ہوگئی ہے

ثنااللہ ناگرہ جمعہ 10 جنوری 2025 20:42

سونے کی قیمت میں مسلسل چوتھے روز بھی اضافہ، نئی قیمت 2 لاکھ 79 ہزار سے ..

کراچی (اردو پوائنٹ اخبارتازہ ترین۔ 10 جنوری 2025ء) عالمی مارکیٹ میں سونے کی قیمتوں میں اتار چڑھاؤ کا سلسلہ جاری ہے، عالمی منڈی میں سونے کے نرخ بڑھنے پر پاکستان میں بھی قیمتوں میں نمایاں اضافہ ہوگیا ہے۔ میڈیا رپورٹ کے مطابق عالمی مارکیٹ میں سونے کی قیمتوں میں اضافہ ہونے کے باعث پاکستان میں بھی چار روز میں سونے کی فی تولہ قیمت میں 4 ہزار 400 روپے جبکہ 10 گرام سونے کی قیمت میں 3499 روپے اضافہ ہوگیا ہے۔

ملک میں آج فی تولہ سونے کی قیمت میں 1100 روپے کا اضافہ ہوا ہے۔ فی تولہ سونے کی قیمت بڑھنے کے بعد مقامی صرافہ بازاروں میں نئی قیمت 2 لاکھ 79 ہزار 400 روپے ہوگئی ہے۔ اسی طرح دس گرام سونے کی قیمت بھی پھر بڑھ گئی ہے۔ 10 گرام سونے کی قیمت میں 943 روپے کا اضافہ ہوا ہے۔ نئی قیمت 2 لاکھ 39 ہزار 540 روپے کی سطح پر پہنچ گئی۔

(جاری ہے)

عالمی مارکیٹ میں سونے کی قیمت میں 11 ڈالر اضافہ ہوا ہے، جس کے باعث سونے کی قیمت 2676 ڈالر فی اونس ہوگئی ہے۔

مزید برآں پاکستان کی انٹربینک مارکیٹ میں امریکی ڈالر کے مقابلے میں پاکستانی روپے کی قدر میں اضافہ ریکارڈ کیا گیا ہے۔ سٹیٹ بینک آف پاکستان کے مطابق جمعہ کو انٹربینک مارکیٹ میں امریکی ڈالر کے مقابلے میں پاکستانی روپے کی قدر میں 03 پیسے کا اضافہ ریکارڈ کیا گیا ہے جس کے بعد اس کی نئی قیمت 278 روپے 57 پیسے ہو گئی ہے۔ انٹربینک مارکیٹ میں سعودی ریال کی قدر 74 روپے 21 پیسے جبکہ بحرینی دینار کی قدر 738 روپے 96 پیسے رہی۔

اسی طرح عمانی ریال کی انٹربینک مارکیٹ میں قدر 723 روپے 61 پیسے رہی، کویتی دینار کی قدر 902 روپے 94 پیسے اور قطری ریال کی قدر 76 روپے 42 پیسے ریکارڈ کی گئی۔ دوسری جانب اوپن مارکیٹ میں امریکی ڈالر کی قیمت خرید 278 روپے 70 پیسے اور قیمت فروخت 280 روپے 20 پیسے ریکارڈ کی گئی۔