پنجاب کے وسطی اضلاع میں برفباری اور تاریخی سردی کی خبر بے بنیاد ہے، ترجمان محکمہ موسمیات

ہفتہ 11 جنوری 2025 13:35

لاہور (اُردو پوائنٹ اخبارتازہ ترین - اے پی پی۔ 11 جنوری2025ء) محکمہ موسمیات نے پنجاب کے وسطی اضلاع میں برفباری اور تاریخی سردی کے حوالے سے سوشل میڈیا پر چلنے والی خبر کی تردید کی ہے، ترجمان کے مطابق یہ خبر بے بنیاد اور حقائق کے برعکس ہے جس میں دعوی کیا گیا ہے کہ 12 سے 15جنوری تک کی راتیں پاکستان کی 100 سالہ تاریخ کی سرد ترین راتیں اور دن ہو سکتے ہیں اور اس دوران سعودی عرب کی طرح دن یا رات کو برفباری بھی ہوسکتی ہے، جن علاقوں میں برفباری ہو سکتی ہے ،ان میں گجرات، جھنگ، ٹوبہ ٹیک سنگھ، ملتان، خانیوال، بہاولپور، قصور ، وہاڑی، اوکاڑہ، ساہیوال، حافظ آباد، چکوال، جہلم، میانوالی، بھکر، لیہ، چنیوٹ، سرگودھا، خوشاب، ڈیرہ غازیخان، راجن پور، اور رحیم یار خان کے اضلاع شامل ہیں۔

ترجمان نے اس کی تردید کرتے ہوئے کہا کہ پنجاب کے وسطی اضلاع میں کوئی برفباری ممکن نہیں، یہ علاقے جغرافیائی اور موسمیاتی اعتبار سے ایسی صورتحال کے لیے موزوں نہیں ہیں،البتہ پنجاب کے ان علاقوں میں تیز ہوائوں کے ساتھ بارش اور بوندا باندی کا امکان ظاہر کیا گیا ہے ۔

(جاری ہے)

ترجمان نے کہا کہ ایسی خبروں کا مقصد صرف لوگوں میں خوف و ہراس پیدا کرنا ہوتا ہے لہذا عوام ان پر بالکل کان نہ دھریں ۔ترجمان نے مزید کہاکہ پاکستان محمکہ موسمیات موسمی اعتبار سے اپنے عوام کو مستند ڈیٹا فراہم کرتا ہے جواس کی سرکاری ویب پر موجود ہوتا ہے۔