ملک کے مختلف شہروں میں دھند کے ڈیرے ، موٹر ویز متعدد مقامات سے بند ،ٹرینوں کا شیڈول متاثر رہا

ایم ون ، ٹو ،تھری ،فور،فائیو ،لاہور سیالکوٹ موٹر وے ایم 11 پر ٹریفک کا داخلہ بند رکھا گیا ،حد نگاہ بہتر ہونے پر ٹریفک بحال

بدھ 15 جنوری 2025 11:38

لاہور(اُردو پوائنٹ اخبارتازہ ترین - این این آئی۔ 15 جنوری2025ء)ملک کے مختلف شہروں میں دھند کے ڈیرے برقرار ہیں، حد نگاہ کم ہونے پر موٹر ویز متعدد مقامات سے بند رہی،مسافر ٹرینوں کا شیڈول بھی متاثر رہا۔ترجمان موٹر وے پولیس کے مطابق حد نگاہ کم ہونے کے باعث موٹر وے ایم ون پشاور سے صوابی تک جبکہ ایم ٹو لاہور سے خانقاہ ڈوگراں تک بند ہے، ایم 3 لاہور سے درخانہ تک ٹریفک کیلئے بند رکھی گئی ۔

موٹر وے ایم 4 گوجرہ سے ملتان، ایم 5 ملتان سے روہڑی تک بند ہے جبکہ لاہور سیالکوٹ موٹر وے ایم 11 پر بھی ٹریفک کا داخلہ بند رہا تاہم حد نگاہ بہتر ہونے پر مرحلہ وار کھول دیا گیا ۔لاہور اور گردونواح میں شدید دھند کے باعث مسافر ٹرینوں کا شیڈول بھی متاثر ہوا ہے، حد نگاہ کم ہونے پر متعدد ٹرینیں تاخیر کا شکار ہوئیں جس سے مسافروں کو پریشانی کا سامنا کرنا پڑا۔

(جاری ہے)

بتایا گیا ہے کہ حد نگاہ کم ہونے پر خیبر میل 1 اپ 4 گھنٹے 19 منٹ ، خیبر میل 2 ڈائون 2 گھنٹے 51 منٹ ،گرین لائن 5 اپ 1 گھنٹے 21 منٹ ،گرین لائن 6 ڈائون 1 گھنٹہ 08 منٹ ، تیز گام 7 ڈائون 23 منٹ ،ہزارہ ایکسپریس 2 گھنٹے 21 منٹ ،ملت ایکسپریس 8 گھنٹے 12 منٹ ، پاک بزنس ایکسپریس 3 گھنٹے جبکہ بولان میل 1 گھنٹہ تاخیر کا شکار رہی جس کی وجہ سے ان ٹرینوں کے مسافروں کو شدید پریشانی کا سامنا کرنا پڑا۔

دوسری جانب ملک بھر میں سردی کی شدت بھی برقرار ہے، شمال مغربی بلوچستان میں چند مقامات پر ہلکی بارش اور برف باری کا امکان ہے، کوئٹہ، چمن، زیارت، پشین، قلعہ عبداللہ اور دیگر علاقوں میں بادل برسیں گے۔بالائی علاقوں میں کڑاکے کی سردی پڑی، لہہ میں درجہ حرارت منفی 12، گوپس منفی11، استور، سکردو میں منفی 10، کالام منفی7 ریکارڈ کیا گیا، ہنزہ میں منفی6، بگروٹ منفی5، چترال اور دیگر میں منفی 4 ڈگری سینٹی گریڈ رہا۔