تمام بڑی جماعتیں پی ٹی آئی کے موقف کی تائید کر رہی ہیں ،جلد ایک گرینڈ الائنس بننے جا رہا ہے‘شاہ محمود قریشی

لاہور (اُردو پوائنٹ اخبارتازہ ترین - این این آئی۔ 12 فروری2025ء) پاکستان تحریک انصاف کے رہنما و سابق وزیر خارجہ شاہ محمود قریشی نے دعویٰ کیا ہے کہ تمام بڑی جماعتیں پی ٹی آئی کے موقف کی تائید کر رہی ہیں اور جلد ہی ایک گرینڈ الائنس بننے جا رہا ہے،پی ٹی آئی کو کسی ڈیل کی ضرورت نہیں، وہ عدالتوں کا سامنا کریں گے اور بے گناہی ثابت کرکے سرخرو ہوں گے،آئی ایم ایف بریفنگ سے ملک میں قانون کی عملداری کا اندازہ لگایا جا سکتا ہے ۔

ان خیالات کا اظہار انہوںنے لاہور میں انسداد دہشتگردی عدالت کے باہر میڈیا سے غیر رسمی گفتگو کرتے ہوئے کیا ۔شاہ محمود قریشی نے کہا کہ ماضی میں کبھی ایسا نہیں ہوا کہ آئی ایم ایف کا وفد چیف جسٹس سے بریفنگ لے۔ آئی ایم کی بریفنگ سے ملک میں قانون کی عملداری کا اندزہ لگایا جاسکتا ہے ۔

(جاری ہے)

انہوں نے کہا کہ موجودہ صورتحال میں شہباز شریف اور حمزہ شہباز تمام مقدمات سے بری ہو جائیں گے جبکہ میں حلفیہ کہتا ہوں کہ 9مئی کے کیسز میں بے قصور ہوں ۔

ان کا مزید کہنا تھا کہ دو جج صاحبان نے کہا کہ پہلے فیصلہ ہونے دیں، اگر 26ویں ترمیم کی درخواستوں کا انتظار کر لیا جاتا تو زیادہ بہتر ہوتا، اب بلاوجہ ایک نیا تنازع کھڑا ہوگیا ہے۔شاہ محمود قریشی نے دعویٰ کیا کہ تمام بڑی جماعتیں پی ٹی آئی کے موقف کی تائید کر رہی ہیں اور جلد ہی ایک گرینڈ الائنس بننے جا رہا ہے۔ شاہد خاقان عباسی اپنی حکومت سے لاتعلق ہو چکے ہیں اور پی ٹی آئی کے ساتھ کھڑے ہیں جبکہ مفتاح اسماعیل، محمود خان اچکزئی اور مولانا فضل الرحمان بھی ان کے موقف کی حمایت کر رہے ہیں۔

انہوں نے حکومت پر الزام عائد کرتے ہوئے کہا کہ حالات بدل چکے ہیں لیکن حکومت ہٹ دھرمی پر اتر آئی ہے۔ صوابی میں جلسے کے باوجود دفعہ 144نافذ کر دی گئی جبکہ عطا تارڑ کا جلسہ بغیر کسی رکاوٹ کے منعقد ہوا۔ انہوں نے ملتان میں اپنی بیٹی کی گرفتاری کو بھی امتیازی سلوک قرار دیا اور کہا کہ عوام سب کچھ دیکھ رہے ہیں۔شاہ محمود قریشی نے مزید کہا کہ بانی پی ٹی آئی نے اپنے خط میں 6نکات پیش کیے جو مثبت تجاویز پر مبنی تھے اور انہیں عالمی سطح پر پذیرائی بھی ملی، لیکن حکومت کی جانب سے کوئی جواب نہیں دیا گیا۔

انہوں نے واضح کیا کہ پی ٹی آئی کو کسی ڈیل کی ضرورت نہیں، وہ عدالتوں کا سامنا کریں گے اور بے گناہی ثابت کرکے سرخرو ہوں گے۔دوسری جانب لاہور کی انسداد دہشت گردی کی عدالت میں مسلم لیگ (ن) کا آفس جلانے اور کلمہ چوک پر کنٹینر جلانے سمیت 4مقدمات میں شاہ محمود قریشی کی درخواستِ ضمانت کی سماعت ہوئی۔عدالت نے شاہ محمود قریشی کی عبوری ضمانت میں 8اپریل تک توسیع کر دی۔دورانِ سماعت پراسیکیوشن نے مقدمات کا ریکارڈ پیش کرنے کے لیے مہلت مانگ لی۔عدالت نے آئندہ سماعت پر ضمانت کی درخواستوں پر وکلا سے دلائل طلب کر لیے۔