بانی پی ٹی آئی کا آرمی چیف کو خط لکھنے کا مطلب ترلے کی آخری حد ہے، ملک احمد خان

خط کا مفصل جواب وصول کنندہ کی جانب سے آ چکا ہے‘ اسپیکرپنجاب اسمبلی کی میڈیا سے گفتگو

جمعہ 14 فروری 2025 17:17

لاہور (اُردو پوائنٹ اخبارتازہ ترین - این این آئی۔ 14 فروری2025ء) اسپیکرپنجاب اسمبلی ملک محمد احمد خان نے کہا ہے کہ بانی پی ٹی آئی کا آرمی چیف کو خط لکھنے کا مطلب ترلے کرنے کی آخری حد ہے،خط کا مفصل جواب وصول کنندہ کی جانب سے آ چکا ہے۔انہوں نے پنجاب اسمبلی کے احاطے میں میڈیا سے گفتگو کرتے ہوئے کہا کہ جن کو خط لکھا گیاانہوں نے کہا کہ میں اس خط کو پڑھوں گا بھی نہیں،وزیر اعظم کو بھیج دوں گا،اگر خط وصول کنندہ نہیں پڑھیں گے تو وزیر اعظم بھی نہیں پڑھیں گے،یہ خط انہی خطوط کی ایک کڑی ہے،جب انکی صوبوں میں حکومت تھی اوروزیرخزانہ شوکت ترین ملک کوڈیفالٹ کروانے پر تلے ہوئے تھے۔

اسپیکر ملک احمد خان نے کہا کہ ماضی میں ان کی پہلے بھی کوشش رہی کہ ملک ڈیفالٹ کا شکار ہوجائے،ان کا ایجنڈا صرف ایک تھا کہ ملک ڈیفالٹ کرجائے،وہ پاکستان میں سیاسی عدم استحکام،عدالتوں میں تقسیم اورمعاشی عدم استحکام لانا چاہتے تھے،آج ان کے حالات دیکھ لیں کہ عمر ایوب اب آئی ایم ایف کو خط لکھ رہے ہیں،معزز جج صاحبان کا سابق وزیراعظم کو گھر بھیجنے کی صورتحال سب کے سامنے ہے،کس طرح جج صاحبان نے 184/3کو 58ٹوبی کیساتھ مکس کیا،فرد واحد جب آئین کی شکل بگاڑتا ہے اور اس کو سپریم کورٹ سے حمایت مل جاتی ہے۔

(جاری ہے)

میں ایاز صادق کی پارلیمنٹ کوسلام پیش کرتا ہوں۔ انہوں نے کہا کہ آج پوری دنیا میں ریٹ ٹیرف پر بات ہورہی ہے،آج دیکھیں بھارتی وزیر اعظم امریکہ میں بیٹھے ہیں اور ٹریڈ ٹیرف پر بات کررہے ہیں،بانی پی ٹی آئی اور انکے حواری کی حرکتوں پر پریشان ہوں کہ آخران کاایجنڈا کیاہے،عمرایوب جوآئی ایم ایف کوخط لکھ رہے ہیں اس کی کیا وجوہات ہیں،معاشی اشاریے درست سمت میں جانا شروع ہو گئے ہیں۔