ح*اپوزیشن اتحاد کے رہنماؤں نے پیر پگارا سمیت جی ڈی اے قیادت سے ملاقات

اتوار 23 فروری 2025 17:10

،کراچی(اُردو پوائنٹ اخبارتازہ ترین - آن لائن۔ 23 فروری2025ء)پی ٹی آئی اور دیگر جماعتوں پر مشتمل اپوزیشن اتحاد تحریک تحفظ آئین پاکستان کے رہنماوں نے پیر پگارا سمیت جی ڈی اے قیادت سے ملاقات کی۔ میڈیا رپورٹ کے مطابق تحریک انصاف اور اپوزیشن اتحاد کے رہنماوں نے کراچی میں پیر پگارا صبغت اللہ شاہ راشدی، جی ڈی اے رہنما صدر الدین شاہ راشدی سے ملاقات کی جس دوران اہم امور پر گفتگو کی گئی۔

(جاری ہے)

اس موقع پر اسد قیصر نے کہا کہ جی ڈی اے نے ان کی دعوت قبول کی ہے، ملک بھر سے نمائندگی آئے گی کہ پاکستان کو کیسے بچانا ہے، ضرورت ہے کہ پوری قوم نکلے، پیپلز پارٹی نے بڑا مایوس کیا۔ سلمان اکرم راجا نے کہا کہ پی ٹی آئی کی سیاست عوام کی سیاست ہے، پورے ملک میں لوگوں کے حقوق کی جنگ لڑیں گے۔سربراہ تحریک تحفظ آئین پاکستان محمود خان اچکزئی نے کہا کہ پیر صاحب پگارا کا ایک مقام ہے، انہوں نے وطن کی آزادی کے لئے جدوجہد کی۔جی ڈی اے رہنما صدر الدین شاہ راشدی نے کہا کہ تمام ایشوز پر کھل کر بات ہوئی، خواہش ہے ہم سب مل کر پاکستان اور آئین کو مضبوط کریں۔