رمضان المبارک کا چاند دیکھنے کیلئے رویت ہلال کمیٹی کا اجلاس آج ہوگا

اسلام آباد(اردوپوائنٹ اخبار تازہ ترین۔28فروری 2025)رمضان المبارک کا چاند دیکھنے کیلئے رویت ہلال کمیٹی کا اجلاس آج ہوگا،محکمہ اوقاف کے مطابق رمضان المبارک 1446 ہجری کا چاند دیکھنے کیلئے مرکزی رویت ہلال کمیٹی کا اجلاس آج پشاور میں مولانا عبدالخبیر کی زیر صدارت ہوگا،ترجمان وزارت مذہبی امور کے مطابق چیئرمین مرکزی رویت ہلال کمیٹی مولانا عبدالخبیر آزاد اجلاس کی صدارت کریں گے۔

اس کے علاوہ کراچی، کوئٹہ، اسلام آباد، لاہور سمیت دیگر علاقوں میں زونل کمیٹی کے اجلاس ہوں گے۔ چاند نظر آنے یا نہ آنے کا حتمی اعلان چیئرمین رویت ہلال کمیٹی کریں گے۔ترجمان وزارت مذہبی امور نے مزید بتایا کہ چاند نظر آنے یا نہ آنے کا اعلان مرکزی کمیٹی کرے گی۔مرکزی اور زونل کمیٹیاں چاند کی رویت کا جائزہ لینے کے بعد اپنی سفارشات مرتب کریں گی جس کے بعد ملک بھر میں رمضان کے آغاز کا باضابطہ اعلان کیا جائے گا۔

(جاری ہے)

دوسری جانب جامع مسجد قاسم علی خان کی مقامی رویت ہلال کمیٹی کا اجلاس بھی کل پشاور میں منعقد ہوگا، جس کی صدارت مفتی شہاب الدین پوپلزئی کریں گے۔اسی طر ح اسلام آباد میں زونل رویت ہلال کمیٹی کا اجلاس وزارت مذہبی امور میں منعقد کیا جائے گا جہاں چاند کی رویت سے متعلق شہادتیں موصول کی جائیں گی۔اجلاس میں محکمہ موسمیات، سپارکو اور دیگر متعلقہ اداروں کے نمائندے بھی شریک ہوں گے۔

یاد رہے کہ چند روز قبل رویت ہلال کمیٹی کے چیئرمین نے ملک بھر میں ایک ہی روز روزہ رکھنے کی نوید سنا ئی تھی۔ملک بھرمیں ایک ہی روزرمضان المبارک کے آغازکی تیاریاں کی جارہی تھیں۔ کامیاب کوششوں سے ایک ہی دن روزہ اورعید کرنے کی روایت برقراررکھیں گے۔سماءنیوز سے گفتگو کرتے ہوئے چیئرمین رویت ہلال کمیٹی مولاناعبدالخیر آزاد کا کہنا تھا کہ ہماری بھرپور کوشش تھی کہ ملک بھرمیں ایک ہی دن روزہ رکھاجائے اورملک بھر میں ایک ہی روز فرزندان اسلام روزہ رکھیں گے۔

رمضان المبارک کا چاند دیکھنے کےلئے پشاور میں اجلاس ہوگا۔ملک بھر میں ایک ہی روز روزہ اورعید کیلئے کامیاب کوشش پرخوشی ہوتی تھی۔ قبل ازیں سپارکو نے پاکستان میں رمضان المبارک 2 مارچ 2025 سے شروع ہونے کا امکان ظاہر کیا تھا۔اسپیس اینڈ اَپر ایٹماسفئیر ریسرچ کمیشن کے ترجمان کا کہنا تھا کہ شوال کا چاند 30 مارچ کو متوقع ہے اور عیدالفطر 31 مارچ کو ہوسکتی تھی۔

سپارکو کے ترجمان نے یہ وضاحت بھی کی تھی کہ رمضان کے چاند کی رویت کا حتمی فیصلہ رویت ہلال کمیٹی کے پاس تھا۔ سپارکو کے ترجمان کا یہ بھی کہنا تھا کہ رمضان المبارک کا چاند 28 فروری 2025 کو شام 5 بج کر 45 منٹ پر پیدا ہوگا اور 28 فروری کو غروبِ آفتاب کے وقت چاند کی عمر 12 گھنٹے ہوگی۔ترجمان کا کہنا تھا کہ سعودی عرب میں رمضان المبارک یکم مارچ سے شروع ہوگا۔