Live Updates

امریکا اور افغان طالبان کے درمیان براہِ راست مذاکرات پاکستان کی موجودہ ناجائز حکومت کیلئے سبق ہے

جتنی بھی جنگیں لڑی جائیں آخرکار مذاکرات کی میز پر ہی بیٹھنا پڑتا ہے، تو کیوں نہ مذاکرات کو پہلی ترجیح بنایا جائے، مرکزی رہنماء پی ٹی آئی اسد قیصر کا ردعمل

ثنااللہ ناگرہ جمعرات 20 مارچ 2025 23:28

امریکا اور افغان طالبان کے درمیان براہِ راست مذاکرات پاکستان کی موجودہ ..

لاہور ( اردوپوائنٹ اخبار تازہ ترین۔ آئی پی اے ۔ 20 مارچ 2025ء ) مرکزی رہنماء پی ٹی آئی اسد قیصر نے کہا ہے کہ امریکا اور افغان طالبان کے درمیان براہِ راست مذاکرات پاکستان کی موجودہ ناجائز حکومت کیلئے سبق ہے، جتنی بھی جنگیں لڑی جائیں آخرکار مذاکرات کی میز پر ہی بیٹھنا پڑتا ہے، تو کیوں نہ مذاکرات کو پہلی ترجیح بنایا جائے۔ انہوں نے ایکس پر اپنے بیان میں کہا کہ امریکا کے نمائندۂ خصوصی ایڈم بوہلر اور افغان طالبان کے درمیان براہِ راست مذاکرات میں پاکستان کی موجودہ ناجائز حکومت کے لیے سبق ہے کہ جب حالیہ صدی کی سب سے بڑی جنگ کے دو حریف براہِ راست مذاکرات کر سکتے ہیں اور اپنے مسائل حل کر سکتے ہیں، تو اس جنگ سے متاثرہ وہ صوبہ، جہاں ہر گھر سے بے گناہ لوگوں کی لاشیں اٹھیں اور کاروبار تباہ ہوئے، افغانستان سے براہِ راست بات چیت کیوں نہیں کر سکتا.چاہے جتنی بھی جنگیں لڑی جائیں، آخرکار مذاکرات کی میز پر ہی بیٹھنا پڑتا ہے، تو کیوں نہ 'مذاکرات کو پہلی ترجیح' بنایا جائے۔

(جاری ہے)

اسد قیصر نے مزید کہا کہ اسی طرح جماعت اسلامی پاکستان کے مرکزی جنرل سیکرٹری لیاقت بلوچ سے ملاقات کی، جس میں ملکی مجموعی سیاسی صورتِ حال پر تفصیلی تبادلہ خیال ہوا۔ ملاقات میں دونوں رہنماؤں نے غزہ پر اسرائیل کے نہ رکنے والے وحشیانہ تشدد کی بھرپور مذمت کی۔پاکستان تحریک انصاف بلوچستان میں امن و امان سمیت دیگر مسائل پر حزبِ اختلاف کی جماعتوں کا اتحاد بنا رہی ہے، اور بلوچستان کے مسئلے پر جماعت اسلامی کے آئندہ ماہ 14 تاریخ کو ہونے والے جماعت اسلامی کی آل پارٹیز کانفرنس میں پاکستان تحریک انصاف شرکت کرے گی۔

لیاقت بلوچ صاحب نے جماعت اسلامی کی جانب سے عمران خان سمیت تمام سیاسی قیدیوں کی رہائی پر زور دیا، کیونکہ موجودہ ملکی حالات میں تمام سیاسی قیادت کا ایک پیج پر ہونا انتہائی اہم ہے۔دونوں رہنماؤں نے آئندہ بھی دونوں جماعتوں کے درمیان نشستوں کے تسلسل پر اتفاق کیا۔